Nimin, kumina Pathianni hmasa ber chu Mizoram Presbyterian Kohhran chuan kumin chhung atana hming sande sikul hming ziahna hun leh pawl siamremna ni atan an hmang. Naupang Sande Sikul (NPSS) department tinah chuan pawl sawn, pawl siamrem leh hming ziahluhna ni atan an hmang bawk a. Chawlhni leh atan hian pawl tinah zirlai lam hawiin hun an hmang tawh dawn a ni. Kumin chhung hian puitling department-ah zirlai atan Rev. Dr. L.H. Rawse-a ziah ‘Thuthlung Thar Zirtirna’ tih zir a ni dawn a. Presbyterian Kohhran Puitling Sunday School zirlaibu hi Mizo tawnga ziah lehkhabu malkhai-ah chuan copy chhut chhuah tam ber a ni thin a. Kumin atan hian copy 95,000 zet chhut a ni.
Hetih lai hian Salvation Army chuan Pathianni hmasa ber hi ‘Chhungkaw pual inkhawm’ (Family Sunday) ni-ah hmangin, vawiin chawhma inkhawmah khan corps leh society hrang hrangah an hmang a. Salvation Army te hian kumtinin Chhungkaw pual inkhawm hi Pathianni hmasa berah an hmang thin a, he ni pual hian hun bik siamin an hmang a. Pathian thuchah sawitute’n chhungkaw pawimawhna chungchang an sawi tlangpui a, chhungkua a Pathian fakna hla sa leh Pathian thu chhiar rual turte an inruat bawk a, hun hlimawm tak an hmang a ni.The Salvation Army te hian nimina Chhungkaw Ni an hman bakah hian, naktuk zan hian Chhungkaw Zan an hmang leh dawn bawk a, in tinah zan dar 8 ah chhungtin ten inkhawm buatsaihin, kumina an thupui ‘Krista ang tura Tihdanglam’ tih hmangin chhung inkhawm an buatsaih leh dawn a ni.
Baptist Kohhran chuan kum 2025 Pathianni hmasa ber chu Inhlantharna hun atan an hmang a. Tualchhung Kohhran hrang hrang te’n Inhlantharna hun hi anmahni kohhran mila siamin inkhawm hruaitu in thuchah a sawi nghal a. Thupui awmsa hmangin an tawngtairual a, kohhran Secy report te ngaihthlak niin zaipawl leh malzaite ngaihthlak a ni. Missionary Day, January ni 11-ah ruai nen lawm leh turin an inpuahchah a, Kohhran ho zaikhawm pawh chhunzawm zelin January ni 13 thleng zaikhawm turin programme duan lawk a ni. UPC (NEI) kohhran chuan tualchhung kohhran remchan dan angin, Pathianni hi kumthar lawmna anga hmang an la awm laiin, Sunde Sikul pawl siamrem leh hming ziahluhna ni atana hmang an awm bawk a. Bial thenkhatah chuan rawngbawltu ruat tharte Pathian hnena hlanna hun an hmang a ni.
