NITI Aayog member Dr Vinod Kumar Paul chuan natna hmuhchhuah hma hi hriselna lam leh damlo enkawlna atana thil pawimawh tawpkhawk a ni, a ti. Zoram Medical College & Hospital-in an hnathawh an enletna hun hmanpui-in zan khat riaka Mizorama rawn zin NITI Aayog member chuan hriselna kawnga thawhna chuan mitin a thleng pha tur a ni a, chu mi atan chuan primary health centre te, wellness centre te leh health sub centre te tihchangtluna thuam that a ngai a ni a ti.
Mipui hriselna lam atana thawktute chu kum 3 emaw kum 4 chhung vela ngawr natna, sikserh, phar natna, German sentut (rubella) leh sentut (measles) te tibo tura nasa leh zuala tan la turin a sawm a ni. He inkhawmah hian Health Minister Pi Lalrinpuii, Principal Economic Director Anna Roy, NEC Economic Advisor Sherry Lalthangzo te an tel a. ZMC&H thuneitute chuan Dr. Paul hnenah hian an mamawh hrang hrangte an lo thlen a.
Chu’ng zingah chuan kum 2025-2026 session chhunga Master of Medicine leh Master of Surgery class hawn phalnate, Mizorama doctor indaih lohna sutkiante a tel a. Ministry of Health & Family Welfare a ZMC&H tihchangtlunna atana cheng vaibelchhe 313 leh nuai 84 dil mek pek chhuah thuai ni se an duh thute an sawi bawk a ni.
