Sports and Youth Services Minister Pu Lalnghinglova Hmar chuan kum 2036 Olympics ah Mizo infiammi a tam thei ang berin Medal an lak theihnan inbuatsaih mek a ni a ti a, hemi atan rampuma a vawi khat nan Mizoram chuan National Sports Conclave a buatsaih dawn a ti.
Vawiina a pisa a thutharthehdarhtute a kawmna ah Sports Minister chuan, National Sports Conclave chu a tumkhatna atan karleh June 13 leh ni 14 ah Baptist Centre, Falkland, Aizawlah neih a ni dawn a ti a, he Conclave hi National level sports intawhkhawmna niin, Olympics 2036 a Mizo infiammi tam thei ang berin Olympic medal an awrh theihna tura inbuatsaihna hmasa a ni a ti a, India ram state zingah Mizoram chu Olympics 2036 vision nei a National level Sports Conclave buatsaih hmasa ber a ni a ti bawk.
Sports minister chuan, Olympics 2036 thlen tumin India a inbuatsaih mek a, hma lak nghal char char a tul tawh avangin, theihtawp chhuahin Mizoram sawrkar a inbuatsaih a, hmalakna hmasa ‘Mizoram Sports Conclave – Preparing Mizoram for Olympic Games, 2036’ buatsaihnan HRDS hnuaiah Rs 68,80,500/- chu sawrkar laipuiin a pe tawh a ti a, Conclave hi kum dangah pawh neih chhunzawm zel tum a ni a ti bawk.
