Kum kal ta fur laia Tlabung leh a chhehvel mipuiten harsatna an tawh ang a thlen nawn loh nan, National Highway 302 sial ṭhat leh laih zauh hna chu ngawrh takin chhun leh zanah thawh chhunzawm mek zel a ni. Puan tawh ṭhin angin, chhan hrang hrang vanga he kawng sial hna thawh chak theih a nih loh avangin, hna thawh zawh hun tura tih pawh ṭum hnih pawhsei a ni tawh a, a ṭum thumna atan he kawng sial hna thawh zawh hun hi pawhsei leh tum mek a ni tih, NHIDCL hotute chuan Tlabunga Doordarshan palai an hrilh.
Tun dinhmunah he kawngpui, National Highway 302 hi kumin December thla ral hmaa zawh tur ni mah se, tunah hian hna thawh tur za zela 24 vel zawh a ni tawh a, a ṭum hnihna atana hun pawhseiah pawh zawh hman a ni dawn loa a lan avangin, pawhsei leh tum mek a ni tih, NHIDCL hotute chuan an sawi a ni.
Kum kal ta fur hun chhung khan, Tlabung leh a chhehvel khuaten kawng chhia vanga harsatna lian tak an tawh avangin, Lunglei bawrhsap Pi Ramdinliani chuan, March thla a ral hnu-ah chuan lei laih bik chu chhunzawm rih lo turin hnathawktute a lo hriattir tawh a ni.
