Rajya Sabha MP Pu K. Vanlalvena’n NDA sawrkarin hnam tenau zawk te tana thalo tura thil kalpui an tumin na takin an dodal zel a, hnam leh sakhaw him nan theihtawp chhuah chhunzawm zel a tum tih a sawi. Vawiina Kolasib Press Club-a thuthar thehdarhtute a kawmna ah he thu hi sawiin MNF Lok Sabha MP Candidate Pu K.Vanlalvena chuan thlan tlin anih chuan ram leh hnam leh sakhaw himna turin theihtawpin parliament chhung leh pawnah a tul apiang ti turin a inhuam a ti a, ram tana hma alo lak te chu mipuiten hre reng turin a duh tih a sawi. Pu Vena chuan thlan tlin anih chuan NDA Seat ah a thu dawn a ti a, NDA chu Congress kaihhruai UPA Sorkar kal dan duh loh avanga intelkhawm annih avang leh NDA sorkar hma daih atanga anni a ti a, a dintu zingah MNF pawh a tel tih a sawi.
Pu Vena chuan NDA sorkar chuan India ram chu hmasawnna kawngah a chawikang nasa a, hmarchhakah pawh hmasawnna tam tak hmuh theihin a awm tih sawiin an sawrkar leh ngei dawnin a lang a ti a, state pachhe tan Central Sorkar nghen ngaihna chin a awm tih a sawi bawk. BJP hruaitu thenkhat zingah India ram Hindu rama siam tum an awm nia hriat a nih thu sawiin Pu K. Vanlalvena chuan na takin dodal zel an tum a ti a, Hnam leh sakhaw tenau zawkte tana tha lo tura chet an tum chuan na takin an dodal thin tih sawiin a aia na zawka an dodal zel pawh a la tul dawn a ti a, a tul a nih phawt chuan ram leh hnam leh sakhaw himna atan NDA chhuahsan chu an party in an hrehlo tih a sawi.
MNF Sr Vice President Dr R. Lalthangliana chuan Lok Sabha MP ni lai Pu C. Lalrosanga chu Mizoram tan hnu hma tam tak a nei tawhin a kum alo upat deuh tawh avangin midang ti tawh zawk turin party ah a rawn thlen a ti a, party in candidate ah dah nawn duh viau mahse mi tha tam tak an neih avangin Pu Vena dah chu thuthlukna an siam tih a sawi.
Dr R. Lalthangliana chuan Mizoram Politics ah MP inthlan chu ruling chanvo a lian thin a ti a, hun inthlakah Common Candidate te neih chhoh thin niin tun inthlan lo awm turah Congress te nen inbiakna awm mahse harsatna hrang hrang a awm avangin party malin an kal leh zawk a ti a, Common Candidate an neih theih tak lohah chuan Pu K. Vanlalvena an ruat ta tih a sawi a, Pu Vena ang chu party dangin nei ve se an dah ve vekin a rinawm tih a sawi bawk.
