Vawiin khan I&PR Auditorium, Treasury Square-ah, MJA Gen Headquarters leh IPR, P&S Department-te huaihawt, ram puma Chanchinbumite Ni (National Press Day 2025) chu hlawhtling taka hman niin, Pi Betsy Zothanpari, Secretary, IPRP&S Department chu khuallian a ni a. Khuallian hian Mizoram Buai laia inremna atana thawhhlawk tak Pu L.R. Sailo leh Mizo hmeichhia, MJA member zinga mass communication-a Doctoral Digree nei hmasa ber Dr. Lalnunkimi Colney-te hnenah chawimawina thilpek a hlan nghal bawk a ni.
Ram puma Chanchinbumite Ni puala hun hmanah hian khuallian Pi Betsy Zothanpari, Secretary, IPRP&S Department chuan thusawiin, Chanchinbumite chu ram tana rawngbawltu pawimawh tak an ni tih a sawi a.Sawrkar tha tichak zel tur leh mipuite zirtir tura an dinhmun pawimawhzia chu hria a, thahnemngai taka an eizawnna kawngah chuan thiehtawp chhuah zel turin a fuih a. Khawvel hmasawn zelah mi tam takin Chanchinbu chu hriatna hnar rin tlak ber a an ngaih pakhat a nih angin, an thuthar lak khawm leh mipuite a an puan chhuah leh dan thuah pawh fimkhur leh thuhnu dawn taka mipuite hnena puang chhuak thin turin Chanchinbumite chu a chah a. NationalPress Day chu hlimtaka hmang theuh turin duhsakna a hlan nghal bawk a ni.
Vawiina hun hmanah hian MJA member leh hruaitute bakah IPR, P&S Dept. hnuaia thawktute leh mi pawimawh sawm bikte an tel a. Hun hi Pi K. Vanlalsangi, Director, I& PR chuan kaihruaiin, Pu C. Lalrambuatsaiha, President, MJA-in kalkhawmte lawmna thu a sawi a. Vawiina chawimawina hlan tak Pu L.R. Sailo & Dr. Lalnunkimi Colney—te hnen atangin thusawi ngaihthlak a ni a. Pu Pratap Chhetri, Deputy Director, I &PR-in National Press Day 2025 thupui Digital Hun-a Print Media Dinhmun ‘The role of print Media in the Digital Age tih hmangin kalkhawmte zirhona neihpuiin, zawhna leh chhanna hun hmann nghal a ni a. Pu C. Lalhmachhuana, Vice President, MJA chuan lawmthu sawiin hun hi a khar a ni.
