National Arm Wrestling Championship 2024, Nagpur a neih zawh taka Mizoram aiawh a kal zinga Medal la te lawmpuina hun vawiin khan Sports & Youth Services Minister Pu Lalnghinglova Hmar hovin EcoSave Conference Hall, Falkland ah hman a ni. National Championship ah hian Mizo Arm Wrestler 24 telin, Medal 22 an hawn a ni.
Sports & Youth Services Minister chuan medalist te a lawmpuina thu sawiin, player sanghnih bawr vel kara medal 22 lai mai an hlawhchhuak thei chu fakawm a ti a. Minister chuan eng sports discipline pawh ni se, sportsman tan chuan mahni tuina a nih chuan ngaihventu leh ngaisangtu an tam emaw, tam lo emaw, tui tlat a kal zel chuan hlawhtlinna in a zui ve zel thu a sawi a. Chutihrual chuan a thei tan chuan sport pakhat aia tam khelh a rem thu a sawi a. Mizo infiammi te zingah sport discipline pakhat aia tam ah inkhel in, chawimawina leh medal te field pakhat aia tam lo la tawh an awm thu a sawi bawk. Hei hian eizawnna kawngah pawh kawng a tihzauh phah theih thu a sawi.
Minister chuan Sorkarin Incentive Cash Award a pek thin chu Olympic Association a in register te hnenah chauh pek nih thin avangin Arm Wrestling Association leh association dang, Olympic Association hnuaia tl ve lo tan a la pek theih rih loh thu a sawi a. Amaherawhchu association ten sawrkar ah mamawhna an neih leh pawl hmasawnna atana tul ang chu inpawh taka sawiho zel tura sawm in, department officer te nen pawh an hmakhua ngaihtuahin hmalak zel a la nih tur thu a sawi.
