Mizo Zirlai Pawl (MZP) General Headquarters chuan Govt. Nepali Primary School Rangvamual a zirlaite School kawta class an lak chungchang tunhnaia Social Media lama lo lang enfiahin a hmunah a tlawh a, an harsatna leh an dinhmunte an zirchiang nghal. Hemi chungchang thuchhuah an siamah MZP chuan Govt. Nepali Primary School Rangvamual hi an building a tet em avangin, zirlai tam zawkin sikul chhung an chang lova, pawn ah class an la thin a, tun dinhmun ah zirlai 127 awm mekin zirtirtu 4 an awm tih an hmuh thu an sawi a, MZP chuan nisa leh ruahsur hnuaia zirna kalpui hi engti kawng mahin a remti lova, tun kar chhung ngeia sawrkarin zirlaite harsatna sukiang tura hma a la lo a nih chuan, a tul angin hma a la dawn tih an sawi.
Govt. Nepali Primary School, Rangvamual-ah hian zirlai Nursery – 30, K.G – 22, Class I – 27, Class II – 19, Class III – 16, Class IV – 13 awm mekin an vaiin zirlai 127 an awm mek a, Zirtirtu a nghet- 2 (pahnih), MR zirtirtu pakhat leh SEDP zirtirtu pakhat an nei mek a ni. MZP Branch Rangvamual chuan tun hma atangin thuneitute hnenah, Govt.
Nepali Primary School Rangvamual hi ngaihsak turin a lo ngen tawh thin tih an sawi a. Aizawl Minicipal Coorporation (AMC) huam chhungah hetianga sawrkar sikul dinhmun chhe lutuk leh ngaihthah a la awm fo hi MZP chuan mak ati a, pawi a ti takzet tih an sawi a ni. MZP General Headquarters hruaitute hian, Rangvamuala Govt. Primary School leh Govt. Middle School-te pawh a tlawh nghal a. Govt. Middle School hi an building a tlabal tawh hle a, zirlaite tan pawh a him tawh lo niin an hria a, a rang lama ngaihsak turin sawrkar thuneitute an ngen nghal tih an sawi bawk.
