Myanmar tualchhung buaina chuan reh lam pan lo in a zual zel a, tunhnaiah Chin state-a tih luihna a sipai ṭan tir an duhloh avangin Lawngtlai District ah raltlan mi 100 dawn an awm belh. Thuneitute sawi danin raltlan te hian Lawngtlai District bakah Khawzawl district pan mi 6 an awm an ti a, an vaiin tunhnaia lo lut te hi mi 95 an ni a, Arakan Army-ah ṭan luih tir an duhloh vanga Mizoram lama rawn tlanchhe ta niin thudawnna chuan a sawi. Raltlan lo lut te hi April ni 30 khan Hruitezawl ah mi 47 an lo lut a, thudawnna in a sawi danin heng lo lut te hi kum lama naupang tak niin Chin State-a Paletwa hmuna Arakan Army ten an pawl sipaia ṭang tura an nawr luih chu duhlo in an rawn tlanchhe ta a ni.
Thudawn danin Paletwa khua ah hian Arakan Army te chuan kum lama naupang zawk te chu sipai zawm vek turin hriattirna a chhuah an ti a, Hruitezawla lo lut zingah hian hmeichhe 7 pawh an tel niin thudawnna chuan a sawi a ni. Home Department in may ni 4 thlenga a chhinchhiah danin tunhnaia lo lut mi 95 te nen hian Mizoram chhungah Myanmar atanga raltlan mi sing 3 sang 4346 an awm mek a, report atanga tarlan danin raltlan zingah hian mi sing 1 sang 7901 te chu raltlan te awmna tur atana sak refugee camp pawn lama awm an ni a, mi sing 1 sang 6445 te chu Mizoram chhunga district 7-a refugee camp ah awm mekin refugee camp-a awmlo te hi inluah leh mahni chhungte ina awm an ni.
Raltlan zingah hian mipa 10,097 awmin hmeichhia 10,947 an awm mek a, an zingah hian naupang 13,302 an awm bawk. Home department hotute sawi danin Myanmar raltlan te hi lut leh chhuak an awm reng avangin an zat tak hriat a harsat thu an sawi a, boruak muanawm hnua an chenna hmuna let leh an awm nual tih an sawi bawk.
