Rajya Sabha MP Pu K.Vanlalvena chuan India leh Myanmar ramri hung a tum chu Mizoram mipuite duhdan a ni lo a, he thutlukna hian Zoram mipuite a thawng hle tih Home Minister Pu Amit Shah a hnenah ziakin a thlen.
Pu K. Vanlalvena chuan British sawrkarin dik lo taka ramri Mizote a siamsak avangin Zofate chu India, Burma leh East Pakistan-ah te tihluihnaa thendarh an nih thu leh he ramri diklo tak hi India a zalen tirh atanga tun thlenga siam that la ni lo hi hnam anga inrahbehna a ni a ti a, He ramri diklo hi siam thata rorelna pakhat hnuaia awm an nghah reng laia ramri hung tumna lo awm ta chuan Zofate a barakhaih a ni tih a sawi bawk a ni.
Pu K. Vanlalvena chuan India independence hnu kum 75 chhung zalen taka lo inkal pawh thinna Free Movement Regime, tihtawp tumna pawhin ramri bul hnaia chengte ve ve tan harsatna nasa tak a siam tur thu a thlen bawk a. Parliament Session kallai mekah Rajya Sabha-ah au chhuah pui turin dilna vawi li lai a thlen chungin hun pek a ni lo tih sawiin Pu K Vanlalvena chuan Lok Sabha lamah Indo-Myanmar fencing siam tum a nih thu te Central Minister ten an sawi chhuah lai a chumi chungchang sawi chhuah phalsak a ni lo chu North East tlangmite dikna zah lohna ni hiala a ngaih thu a sawi bawk a ni.
