Nimin tlai khan Mumbai khawpui a Jio World Drive hmunah ni hnih awh tur Mizoram Pineapple Festival chu Mizoram Horticulture department additional director Pu L. Lalhmingmawia Pachuau-in a hawng.
Horticulture Dept. hnuai a Josie’s Kitchen buatsaih hawngtu Pu L. Lalhmingmawia chuan lakhuihthei kut hi Mizoram tharchhuah lakhuihthei ngei India ram khawpui lian zawk a hralhchhuah a nih theih na’na thehlar tumna atana buatsaih a nih thu leh Sialhawk leh a chhehvel khua atangin lakhuihthei quintal 10 chuang he hun atan hian thawn thlak a nih thu a sawi a. Pineapple Festival-ah hian Lakhuihthei mai bakah Organic Stall, Handloom leh Handicraft leh Mizoram Start-ups te,MOM, Tuichangral FPO te leh dawr dangte hawn tel a ni.
Pineapple Festival neih chhung hian Lakhuihthei thar zawrh chhuah reng a ni a, Lakhuihthei ei tur te, lakhuihthei tui in tur leh Cocktail a zawrh nghal a ni a. Mizoram a tharchhuah tui leh țhat bik zia hi Bollywood ah vawrhlar tum a nih thu leh hei hian kuthnathawktute tan rah țha a chhuah ngei an beisei thu department hotute chuan an sawi.
