Opposition Leader Pu Lalchhandama Ralte chuan vawiina MSSSB chungchanga Private Resolution put luh sawihona ah thalai hna zawng mek tena an chhawr tangkai em em thiah tuma sawrkarin hma a la chu pawi atih thu sawiin thalai hna zawng mek ten MSSSB hna lakah a fair loh sawi tur hrelo in an rintawk em em laia Sawrkarin ram rohlu tak sawrkar hmasa tih anih vanga thiah a tum chu pawi a tih thu sawiin ngaihtuah tha leh se a duh thu a sawi a, MPSC pawh dan ang thlapa awm ni mahse hna la tu Board pakhat chauhah a inthuah nasat thin vangin hna lak a muang em em a, thalai hna zawng te an khawngaihthlak tih sawiin thalai te hmakhua thlir chung zela rorelna keng kawng turin sawrkar a ngen tih a sawi.
Pu Lalchhandama Ralte chuan MSSSB Board chuan hna 328 a la hman a ti a, heng bakah hian Limited Departmental Exam ah mi 149 an la a, Departmental exam pangai ah 52, Departmental promotion Non gazette ah 3097, Regularised tura recommendation hi mi 166 an tih fel sak tih sawiin hna tam tak an thawk chunga tih tawp an tum chu pawi a tih thu a sawi.
Opposition Leader chuan AAO leh Sub Inspector MSSSB in a lak tum mekah thalai tam tak anlo inpuahchah hman tawh thu sawiin sawrkar in zirlaite ti beidawng lo se a duh thu a sawi a, Exam fee pe chu sing 1 sang 1835 an awm tih sawiin AAO ah exam fee an pek luh tawh cheng nuaih 12 sing 56700, leh Excise Department ah cheng nuaih 5 sing 9 sang 7 a awm a ti a, a vaiin thalaiten exam fee an pek chu cheng nuaih 17 sing 6 sang 6400 an pe tawh tih sawiin heng hi sawrkar account ah a lut vek tawh a ti a, thalaiten an inbuatsaih tawh laiin an tih tawp sak ringawt chu thalaite tan a pawi takzet tih a sawi. Sawihona hrang hrang lak niin member 24 in an sawi a, hemi hnu hian Mizoram Subordinate Service Selection Board (MSSSB), Mizo Thalai hnazawng mekte tana rintlak leh tangkai tak thiah chu sawrkar in ennawn rawh se tih Private Resolution Pu Lalrintluanga Sailo in a put luh chu House in a hnawl a ni.
