Chief Minister Pu Lalduhoma’n tunhnaia MPSC-in Combined Competitive exam a kalpui dan leh Forest Officer a lak danah thil fello nia zirlai hruaitu ten a hnena an thlen chu chhui chian a ni dawn a ti. He thu hi nizan khan Khawzawl Zaingen YMA hall-ah sawiin Pu Lalduhoma chuan zirlai hruaitu ten MPSC hnalak danah thil fello awm tia a hnena an thlen chu thil diklo a awm leh awm loh a sawi theih loh thu sawiin chhui chiang turin nimin khan thupek tih chhuah a nih thu a sawi a. Pu M Lalmanzuaia (IAS Retd) chu chhui tura a ruat thu leh ni 7 chhunga report pe tura tih a nih thu a sawi bawk.
Chief Minister chuan MAMCO hnuaia sum tihchingpen chungchanga ZPM MP Candidate Pu Richard Vanlalhmangaiha puhna chungchang pawh sawiin MAMCO a thawh laia an hotupa in mi hrang hrang hnen atanga contract pek tiama pawisa a lak ṭhin chungchangah hriatpuitu atan a tan ṭhin thu leh a hming pawh a sign ngei thu a sawi a, he thubuai chhuichian anih hnuah MAMCO a an hotupa chu thiamloh chantir a ni a, thil tisualtu man chhuah kawngah an party candidate chu a tangkai ber atana hman a nih avangin zalen takin thiam a chang a ti bawk.
Pu Lalduhawma chuan Lok Sabha Inthlanpui lo awm turah Vai ṭawng leh sapṭawng duh ang hmang thiam Lok Sabha MP Candidate Pu Richard Vanlalhmangaiha thlan tlin a nih chuan sorkar laipuiah Mizoram mamawh ṭha takin an thlen thei dawn a, MP-in hma min lo lakpui thei dawn a ni a ti bawk. Chief Minister Pu Lalduhoma hi nimin tlai khan Khawzawl thlengin Circuit House-ah Tuichang North Block ZPM hruaitu ten lo hmuakin tukin khan Tualteah a pan a, Nikuala Hall Chawngtlaiah Campaign a neih chhunzawm dawn a ni.
