Mizoram Public Service Commission hna lak dana thil fel hlel awm ni a puh chhui chiang tura ruat IAS chawl tawh Pu Michael Lalmanzuala chuan naktuk emaw Thawhlehni-ah emaw hian a report a peih hman a rin thu a sawi. Pu Lalmanzuala chuan an hna hi sorkar pisa kal ni, ni 2 chiah an la khawih hman niin a sawi a. A thil chhui-na-ah hian sorkar chuan amah pui turin deputy secretary pahnih an pek thu leh MINECO a Secretariat-ah pisa tur an ruahmansak thu a sawi a.
MPSC a thawkte chawlhtir rih an nih lai-in an document duh angte pe thei turin thawktu thenkhat chu pisa an kai phalsak a ni, a ti. Report hi thehluh theih thuai a inbeisei thu Pu Lalmanzuala chuan a sawi a ni. Puan tawh angin MPSC-in Combined Civil Service leh sorkar hna dang a lak danah thil fel lo a awm ni a puhin MZP chuan MPSC chairman Pu JC Ramthanga chu bang turin an phut a. A ban loh avangin kar kal ta Thawhtanni atang khan MPSC hnathawkte pisa kal tur an dang a ni.
Thawhlehni khan Mizoram sorkara Vigilance Secretary chuan MPSC hna lakna a thil fel lo awm ni a sawi hi chhui chiang turin Chief Secretary hlui, MPSC-a member leh Chairman hna pawh lo thawk tawh Pu Lalmanzuala chu a ruat a. Ni 7 chhunga an thil hmuh dan report thehlut turin tih a ni. Pu Lalmanzuala hi MPSC member-ah kum 4 a awm tawh a, kum 6 chhung chairman hna a chelh bawk a ni.
