Nimin khan Mizoram Pollution Control Board (MPCB)buatsaihin Thirsakawr hmanga India ram pum fang chhuaktu Pu Vanlallawmzuala Varte (LZa) châwimâwina leh lawmpuina hun chu EF&CC Deptt. Minister Pu Lalthansanga uapna hnuaiah Aizawl Zonuam vênga Woodland Hills-ah hman a neih a ni.
He Tour, ‘Ride To Clean Air’ in thupui a ken chu ‘Clean & Green Sustainable Lifestyle Under Mission Life’ a ni a. MPCB hi Main Sponsor niin kumin kum tîr January ni 25 (Ningani) khân MINECO atangin MPCB Chairman Pu Liankima Lailung chuan vai liamin nimin November ni 5 (Thawhlehni) khan Pu LZa hian Aizawl a lo thleng leh a ni.
Forest Minister Pu Lalthansanga chuan Pu LZa hnênah Thangchhuah Diar a hlân a, Pu LZa’n India ram fang chhuak tur khawpa tum ruhna leh thawhrim nachâng a hriate leh amah pui tura MPCB kher thlan nachâng a hria te chu a finthlâkin lâwmawm a ti hlêa, MPCB ngei pawh Mizoram tâna tihchangtlun chhoh zêl a tûl thu a sawi bawk. Kan lo hrisel zawk nan Mizote hian thir sakawr khalh emaw, taksa insawizawina atana tha, infiamna enge chi emaw ber pawh ni se kan tuipui a tul a ti.
