MNF Sr. Vice President Pu Tawnluia’n tun dinhmunah Pu Zoramthanga uapna an la mamawh tih sawiin ramri leh hnam thil-ah a hnathawh ang thawk an awm lo a. Kum 15 lai chief minister lo ni tawh chu sulsutuah an la mamawh niin a sawi. Vawiina Aizawla MNF Party Office Mizo Hnam Run-a inkhawmah thusawiin Pu Tawnluia chuan MNF headquarters hruaitu inthlan turah Party constitution ang chiahin an kal a ti a, MNF party chuan hruaitu term a tawp apiangin official nomination an siam thin a.
A duh tan floor atanga chuh theih a ni a. Floor atanga chuhtu an awm loh chuan official candidate-te tlingah puan thin an ni a ti. Tun tumah pawh hian a duh apiangin floor atangin chuh theih a ni tih sawiin hetih lai hian an official candidate-te chu Nomination Committee-ten an aiawha an thlan chhuah a ni a, chuhtu an awm loh chuan RO-in candidate chhawp chhuahsate chu tlingah puan an ni dawn a ni, a ti.
Pu Tawnluia chuan official candidate-a a hming lang lo chu a duhdan a nih thu a sawi a, MNF chu Mizo hnam party a nih angin, ruling-ah awm lo mah se Mizo nationalism champion-pui turin an kal zel dawn a ti bawk.
