MNF Party chuan Lok Sabha inthlana an candidate atan Rajya Sabha member ni lai Pu K. Vanlalvena an ruat. MP Candidate tur hi vawiin khan MNF Hnam Runah Party President Pu Zoramthanga’n a puang a ni. Pu K. Vanlalvena hi kum 2020 June thlaah Mizoram-in Rajya Sabha-a seat a neih chhun MP atan thlan tlin a ni a. Rajya Sabha MP a nih tan atanga kum thum leh a chanve chhungin Parliament Session-ah vawi 15 thu a sawi tawh a.
Chung zinga vawi 13 chu Chairman remtihnain a sawi a, vawi 2 dangte erawh Chairman-in a phal lo chungin Manipura Zo hnahthlakte thlavang hauhna thu a auchhuahpui a ni. Parliament Session-ah zawhna puitling vawi 22 leh zawhna tenau vawi 40 vel a zawt tawh a ni.Candidate puanna ah MNF President Pu Zoramthanga chuan Lok Sabha MP candidate chu Mizoram mipui aiawhtu leh thil tha tam tak titu a ni a ti a, Opposition atanga MP inthlan hmachhawn a huphurhawm tih sawiin theihtawp an chhuah dawn a ti bawk.
Pu Zoramthanga chuan NDA chu political party hrang hrang thutkhawmna mai a ni a ti a, hnam himna nghawng thei thilah Central NDA Sorkar do zawngin an kal zel tih sawiin CAA, FMR, Assam-Mizoram ramri leh Manipur unaute buainaah an dinna an la sawhsawn ngai lo tih sawiin NDA do na ngam ber chu MNF Party an ni a ti.
Puan tawh angin Mizoram Pradesh Congress Committee chuan kumin Lok Sabha inthlanpui lo awm turah an party candidate atan Pu Lalbiakzama an ruat a. Rorel lai ZPM chuan Richard Vanlalhmangaiha an ruat a, PC Party-in Pi Rita Malsawmi ruatin Pu Lalhriatrenga Chhangte chu independent in a ding dawn a. BJP erawh central lamin an puang dawn niin state-a an thuneituten an sawi.
