Mizoram MLA-te’n an bial chhunga hmasawnna hna an thawhna tur MLA local area fund chu kumin atang hian MLA pakhat zelin cheng nuai 200 an hmang thei tawh dawn.
Tun hnai a Planning and Programme Implementation department-in hriattirna a tihchhuahah chuan MLA tinin an bial hmasawnna atana kumtina sum an hman theih cheng nuai 150 ni thin chu cheng nuai 50 a tipungin cheng nuai 200 a ni tawh dawn tih an tarlang a. A punna hi za zela 33 chuang a ni. MLA fund tihpun a nih avang hian Mizoram sorkar chuan kumtin cheng vaibelchhe 20 a sen belh dawn a. Kum hmasa lama kum tin cheng vaibelchhe 60 sen thin chu cheng vaibelchhe 80-in a pung dawn a ni. MLA fund tihpun tur chungchang hi kumin January ni 8-a legislative party tin aiawh telna General Purpose Committee (GPC)-in thutlukna an lo siam tawh zulzui a kalpui a ni a. Finance department-in an pawm hnu-ah Planning department hian hriattirna a chhuah ta a ni.
Kumin February ni 27 a kum 2024-25 budget a pharh paha a thusawi-ah khan Chief Minister Pu Lalduhoma chuan hei hi a sawi lang lo na chungin budget (Annual Financial Statement)-ah erawh tarlan a ni tawh a ni.
