Mizoram Baptist Kohhran chuan Mizoram Kohhran Hruaitute Committee (MKHC) atanga inhnuhdawh an rel a, Mizoram People’s Forum (MPF) a tel tura sawmna pawh an hnawl rih. Mizoram Baptist Kohhran rorelna sang ber Assembly vawi 129-na chuan Council of Churches in Mizoram (CCM) chu nikum October ni 27-a alo din takah chuan CCM Executive Committee December ni 20-a thukhawm chuan CCM-a member kohhran 9 te chu MKHC-ah tel chhunzawm tawh lo mai ni se, tiin rawtna a siam a, chu an rawtna chu kumin January ni 28-a Administrative Committee thukhawm chuan ngaihtuahin tha a ti a. Hei hi Assembly-ah ngaihtuahin pawm a ni ta a ni. Hetih lai hian MPF a tel ve tura sawmna chu Assembly palaite’n an ngaihtuah hnu-ah tun dinhmunah chuan la tel rih loh ni se an ti bawk. Sapupa leh Pu Buanga te Mizoram chhim chan lam an lo thlen ni, March ni 8 chu Kohhrante’n hlung zawk a hman ni se ti a rawtna pawh Assembly chuan a pawm a ni.
An thurel dangah chuan Mizote kan pun chak loh avangin Fa nei tam tur a inzirtir ni se, Mizorama ruihhlo leh HIV/AIDS, eirukna leh khawtlang sualna hrang hrang do turin tualchhung kohhran tinah a dotu Committee din tura ngen ni se tih te a tel a, he tih lai hian Baptist kohhran Pastor pension tawh te Political Party-ah thuk taka inhnamhnawih lo tur a ngen ni se tih erawh pawm a ni lova. Agenda-ah chuan Mizorama Political party hrang hrang te kalphung leh inrelbawl dan en hian Ram leh hnam siamthat tuma din leh inenkawl ni a an sawi lai hian mipui beisei leh duh dan erawh an pha lo vek niin a lang an ti. Mizo tawng hman dik leh Mizo tawng hman uar kawng a BCM pumpui huapa hmalak rawtna pawm a ni a, hemi pual hian March ni 15 khian BCM Hall Serkawnah hun hman a ni dawn a, Kohhran chanchinbu enkawltu te pawh koh an ni.
Tangka kumthar budget -ah cheng vaibelchhe 132, nuai 74, sing 5 leh sang 6 pawm a ni a. A hmuhna tur hi Kohhran thawhlawm atangin cheng vaibelchhe 91, nuai 27, sing 9 leh sang 3 leh Kohhran Department hrang hrang thawhchhuah tur cheng vaibelchhe 41, nuai 46, sing 6 leh sang 3 niin a punna hi cheng Nuai 708 thelh a ni a, za zela 5 point 63 in a pung a ni.
