Vawiin khan Mizoram Journalists’ Association (MJA) Lunglei District chuan Lunglei Press Club-ah kum 2025 atana inhlan tharna leh annual conference an hmang a. Lunglei District Information & Public Relations Officer Pu C. Lalhruaitluanga’n a hmanpui. Pu C. Lalhruaitluanga chuan kum kal taah I&PR leh MJA te’n thawh hona ṭha tak an nei chu lawmawm a tih thu sawiin, kum tharah pawh thawh hona ṭha vawn him zel a nih a beisei thu a sawi a. MJA member-te chu chanchinbu tihchhuah kawngah leh thu thar theh darh kawngah hmasawn tuma ṭan la tura chahin, digital media ṭhang zel chu pawm thiam a, chumi mil chuan inher rem tum turin a chah a. Social media-a thu dik tawk lo theh darh do let thei ber leh mipui leh sawrkar pawhin thu lakna rin tlak bera an la neih chu journalist-te an la ni reng tih sawiin, ṭha taka sawrkar thawhpui a, ram leh mipui tan ṭhahnem ngai taka thawk zel turin a chah a ni.
District MJA President Pu Laltlanthanga pawhin thu sawiin, MJA member-te chu social media ṭhang chak tak karah mahni zawnah ṭheuh ṭan la turin a chah a. Mahni hnaa rinawm tur leh journalist hna zahawmna vawng nung zel turin a chah bawk. Vawiina MJA Lunglei District inhlan tharna leh annual conference hi Vice President Pu PC Lalduhthlanga’n a kaihruai a. UPC (NEI) Lunglei District Secretary Rev. PC Lalfakawma’n hunserh hmangin, fuihna thuchah a sawi a. Nikum December ni 2-a chatuan ram pan ta, MJA Lunglei District member Pu Johan Lalhmunmawia, DDK Stringer sunna hun hman a nih bakah, Secretary leh Treasurer te report ngaihthlak a ni bawk a. Chawhnu lamah rorel inkhawm buatsaih niin, zanriah kil ho a ni bawk.
MJA Lunglei District hi “Lunglei Journalist Association (LJA)” tiin kum 1972 khan din niin, kum 2006 December ni 1 aṭang khan “MJA Lunglei District” tiin kalpui ṭan a ni a. Tun dinhmunah member 18 an awm mek a ni.
