Mizoram Journalist’s Association General Conference vawi 50-na chu vawiin khan Lianchhiari Run, Aizawl ah hman a ni. He huna khuallian I&PR Addl Secretary Pi Betsy Zothanpari Sailo chuan journalist’s te chu mipuite thuthar hriatna ber annih avangin an hna a pawimawh em em a ti a, tan bik neiloa lai taka thawh a pawimawh tih sawiin mahni thuchhuah turah fimkhur a ngai hle a ti a, mahni hamthatna um ringawt loa mahni hna ngai pawimawh reng tura chahin fimkhur leh uluk takin thu chhuah turin a chah a ni.
Pi Betsy chuan Mizo chu hnamdang tawng hman hunah an tawng muang a, tawng lamah hnamdang te an umpha lo thin a ti a, hetiang lam zawnga hmasawnna tura tour neih chu a tha tih sawiin journalist te chu mahni in chhiar zau tur leh hnamdang te hmuh theiha Mizoram hmel mawina pholang tam turin a chah a, ramchhunga sawrkar hmalakna te pawh pholang tam turin a chah bawk. MJA President Pu C. Lalrambuatsaiha chuan MJA inzawmkhawmna a ngheh zual theih nan in tlawhchhuah a pawimawh a ti a, tun dinhmunah sum lama harsatna a awm rih a angin tih mai a harsa tih sawiin sawrkar bel chungin hmalakna kalpui mek a ni a ti.
President chuan journalist te chu mahni hnaa tui chungin an hmasawnna tur leh pawl hamthatna ngiahtuah tam a ngai a ti a, state dangah pawh pension tawh te sawrkarah dinhmun pawimawh tak an chelh thei tih sawiin Journalist te chuan mahni hamthatna tur kawnga tan lak thar a ngai tih a sawi bawk. Pu Buata chuan mahni inhmuhdan aiin miin min hmuhdan ngaihtuah fo a pawimawh a ti a, mahni dinhmun inthlir thiam a pawimawh tih sawiin member te chu intuaithar theuh turin a chah a, social media khawvelah hmasawnna hrang hrang awm ruala ke pen ve thei tura hmasawn tum turin a chah bawk.
MJA General Conference hi hun thumah then niin Hun khatna hman zawh hian MJA hruaitu thar tur thlanna neih ani dawn a, Hun Thumna hi Rorel Inkhawm atan hman a ni dawn a ni. Tun dinhmunah Mizoram pumah MJA member hi 192 an awm mek a, Aizawlah 91 awmin Lunglei ah member 20 an awm a, Siaha ah 12 awmin Champhai ah 17 an awm a, Kolasib ah 14 awmin Serchhip ah 14 an awm a, Lawngtlai ah member 10 awmin Mamitah member 8 leh Hnahthial ah member 6 an awm a, I&PR Department in Mizoram Press Accreditation list a siamah Accredited Journalist’s mi 142 an awm mek a ni.
