Chief Minister Pu Lalduhoma’n assembly inkhawma a sawi danin sorkar department hrang hrangte chu an hnuai a aikal la awm zat leh an lak chhan/chhuanlam khawn khawm vek tur leh sorkara thehlut tura tih an ni a. Department hrang hrangin an thehluh danah chuan hriselna that loh chhuanlama aikal la hi mi 2,070 an ni a. Inchhungkhur a harsatna nei 703 an awm bawk. In luah tur awm lo, an awmna tur khaw tlawhpawh theih loh leh an thawhna khua a an tawng hman thiam loh leh mimal harsatna hrang hrang chhuanlama aikal la mi 350 an awm a. Chhuanlam tur nei lem lova aikal la tawp mi 90 an awm bawk.
Zirna sang zawk zir avanga aikal la mi 45 an awm a, hotu sang zawk thupek avanga aikal la mi 43 awmin chhan leh chhuanlam chi hrang hrang inang lo tak tak avanga aikal la mi 74 an awm bawk a ni. Department zingah School Education department-ah aikal la an tam ber a, mi 1,115 an ni a, Health and Family Welfare department-in dawtin aikal la 624 an awm a, a pathumna Power and Electricity department-ah aikal la 253 an awm bawk a ni.
Pu Lalduhoma chuan aikal late leh an chhuanlam siam chungchang hi Cabinet thukhawmin a la ngaihtuah tur leh thutlukna a siam tur a nih thu a sawi a. Hna thawk tlaklo na na chu an hna atanga ban mai ni se tih ngaihdan a awm laiin cancer natna veite an vanduai vang a nih avanga ban ngawt chu a felhlel em tih ngaihdante a awm a ni a ti a. Thenkhat chuan aikalte thenkhat chu a aiawhsak ai a thiam leh tha zawkte an awm ni a sawi a awm bawk thu a sawi a ni.
