Cooperation Minister Pu PC Vanlalruata chuan Mizoramin India rama Cooperative Society nei tha ber nei turin theihna a nei a ni a ti. Vawiina All India Cooperative Week Vawi 71-na puala I&PR Conference Hall, Aizawla hun a hmanpuinaah Minister chuan he thu hi a sawi a. Minister chuan tunah hian thlai thar an hralh theih nan society din kawnga hma la ngai lo te pawhin loh theih lohin pawl an indin tih a sawi a. Heng pawl te hi an thawhho theih nan sorkarin ruahmanna a siam tih sawiin Minister chuan heng pawl te hi Cooperative Society a hnuhluh an ngai a. Chutianga Mizoram khaw eng emaw zata Cooperative Society a awm chhoh chuan network lian tak, India ram puma a tha ber Mizoramin a nei thei a ni a ti.
Minister chuan loneitu mahnia inhaichhuak tura harsatna nei te hi Cooperative Society hmanga inhaichhuah dan leh thawhho dan zirtir an nih chuan retheihna a umbo theih a ni a ti a. Ram ei leh bara intodelhna siamtu tur tha tak chu Cooperative Society a lo ni dawn a ni a ti a. Mizorama Cooperative movement tha zawk a lo thlen zel theih nan inpekna leh thawhrimna a pawimawh tih sawiin vawiina kalkhawm te chu thawhrimna nena hmalam pan turin a sawm tih a sawi a ni.
Minister hian Cooperative Tlangau Special Issue a tlangzarh nghal a. Kumina All India Cooperative Week Vawi 71-naah hian thupui atan ram intodelh ‘Viksit Bharat’ a India ram a awm theihna tura Cooperative pawimawhna tih hman a ni. Lunglei District Cooperative Union Ltd (LDCU) buatsaihin All India Cooperative Week vawi 71-na pualin YMA Sub-Headquarters Conference Hall Lungleiah hun hman a ni a, Lunglei High Powered Committee (HPC) Vice Chairman Pu V. Malsawmtluanga MLA chuan he hun hi a hmanpui a, Kolasib-ah pawh 71st All India Cooperative Week’ lawmna chu Deputy Speaker Pu Lalfamkima’n a hmanpui a ni.
