Tunhnaia Mizorama ruahtui chawl loa sur chuan hmun tam takah leimin siamin inkalpawhna kawng tlanglo a awm nual a, chhiatna hrang hrang avang hian chenna in chhuahsan an awm nual bawk.
Fur ruahtui chawl loa sur avang hian hmun tam takah power a khaihlak nasa hle a, Sawrkar chuan thuchhuah siamin mipuite chu chhiatna lian zawk a thlen loh nan hmun him lama awm turin a chah a, mahni chenna hmun leh a chhehvela tui chhe paihna leh tuihawk luankawr te thlithlai a, chhiatna thlen thei a awm anih chuan Disaster ah report vat turin an ngen a ni.
State Disaster Department thuchhuah tarlan danin nimin khan Chanmari atanga Chaltlang pan chhohna kawngah lung tla a awm a, heng bakah hian Kulikawn – Ngaizel kawngah lung tla a awm bawk a ni. Thuchhuah tarlan danin Republic Hmar vengah Pi Laichhingpuii in chu a chimin mihring thi leh hliam an awmlo a, chhungkaw 11 chu hmun him lamah an insawn a ni.
Serchhip District ah chuan Serchhip khawpuiah leimin tenau awmin heng bakah hian Vanchengte kawng chu kaltlang theihloh in leimin in a hnawhping a, Khawzawl District ah chuan Khawzawl leh Dulte inkalpawhna kawng leiminin a hnawh ping bawk a ni.
