Kum thar ni atanga Assam Rifles hovin Zokhawthar leh Khawmawi inkar inkalpawh an khuahkhirh zual tak avangin Myanmar atanga Zokhawthar khua a sikul rawn kalte dinhmun a chiang ta lo hle. Zokhawthar khawtlang hruaitute’n Akashvani Aizawl an hrilh danin Myanmar ram a buai avangin Tiau ral leh lam a Myanmar naupang 500 chuang zet chu Zokhawthar khua-ah sikul an lut a. Mizoram lama sikul rawn lutte hi primary school, middle school, high school leh higher secondary school zirlaite an ni a. Sikul kai hun lai chuan zingah ramri lei rawn kanin sikul an kal a, tlai sikul banah Myanmar lamah an haw phei leh mai thin a ni. Zirlaite hi Khawmawi, Rihkhawdar leh a chheh vel khua atanga rawn kal an ni ber. Tun January ni 1 atanga Assam Rifles-te’n ramri a inkalpawh an khuahkhirh zual takah hian thlasik chawlh tawp, January ni 10 atanga Myanmar naupang sikul rawn kal turte dinhmun a chiang ta lo hle niin Zokhawthar khawtlang hruaitu pakhat chuan a sawi.
Assam Rifles te hian Tiau lei a inkalpawhna bakah luh leh chhuahna atana hman rim deuh 4 dangah silai keng duty an dah mek bawk ni a thu dawn a ni. Sikul academic session a la kal laklawh si a. Tun anga Assam Rifles hovin mi lut leh chhuak an khuahkhirh tak chiamah hian zirlaite tana ruahmanna bik engemaw a awm loh chuan an zirna-in a tuar ang tih a hlauhawm thu a sawi a. Mi 500 chuang zet nitin ramri lei kan tur an nih avangin ruahmanna fel tak siam a nih loh chuan harsatna namen lo an tawk thei niin an sawi a ni. Nikum leh kum hmasa lama Mizoram dep Chin state a khaw thenkhat Myanmar indo thlawhnate’n an rawn bomb fo avang leh sipai sorkar dotu Chin pawlte’n Myanmar sipai hmun an lakna a inkahna nasa tak a awm thin avangin mi sang tel Mizoramah an rawn tlanchhia a. Tam tak an let leh chungin tharum thawhna a awm leh thin avangin an rawn tlanchhe leh thin a. An fate zirlai a bahlah an hlauh avangin nu leh pa tam takin Zokhawthar lamah an fate sikul an kaltir laklawh mek a ni.
Hetih lai hian Champhai Sub Headquarters YMA hruaitute chuan Zokhawthar leh Khawmawi inkalpawhna khar a nih hma hian tunhnai-ah raltlan chhungkaw 100 chuang an lo lut niin an sawi a. Raltlan lo lutte hi Falam khua leh a chhehvela Myanmar sipai leh Chin pawl hrang hrangte inkahna a nasat vang niin an sawi a. Champhai a relief camp a khah vek tawh avangin dah theih an ni tawh lova. Chu vangin chhung khat laina leh an hmelhriat tamna Champhai Kanan veng lamah an khawsa zui deuh ber niin an sawi. Tun hnai-ah hian Myanmar sipaite leh ‘mipui sipai’ tia an sawite hi Falam bakah Tedim leh Tonzang lamah an inkap mek niin an sawi bawk a ni.
