Mizoram Chief Electoral Officer Mahdup Vyas chuan Mizoram chu hun hmasa lamah inthlanna thianghlim leh felfai nia hriat thin alo ni tawh a ti a, kumina Lok Sabha inthlanpui lo awm turah pawh chhunzawm ngei a beisei tih a sawi. He thu hi vawiina Akashvani palai nen an inkawmna ah sawiin Mizoram CEO chuan a tam thei ang berin vote an thlak theih nan kawng hrang hrangin hmalak ani a ti a, sawrkar hnathawk postal ballot hmanga vote thlak mai bakah mipui mamawh zawnga thawktu mimal hnuai ami te pawhin vote an thlak theih nan ruahmanna an siam tih sawiin College hrang hrangah vote thlak tura mahni vote neihna hmun pan tur an awm chuan an vote thlakna an kut ami chhinchhiahna hmangin an zirna hmunah attendance atan an ring thei dawn tih a sawi.
Pu Madhup Vyas chuan Polling station tlawh pawh harsa ni khata thlen theih loh ah a buaipuitu tur Team ten chak takin hma an la a ti a, Mizoramah vote tla chu kum 2019 aia a pun beisei ani tih sawiin thawktuten tan an la zel a, in lama vote thlak bultan tawh niin kum 85 chunglam mi 1824 ten in lama vote thlak dilna an thlen a ti a, vohbik 270 pawhin in lamah vote an thlak dawn tih sawiin District thenkhatah bultan ani tawh tih a sawi. CEO chuan polling station 1276 awm zingah hmeichhe enkawl 136 a awm dawn a ti a, a vawi khat nan pianphunga rualbanloh ten an enkawl polling station pakhat Aizawl North 3 biala Zarkawt Polling station ah dah ani dawn tih sawiin heng bakah hian inthlan buaipuitu zinga kum naupang ten an enkawl 7 a awm dawn a, Lawngtlai district ah 3 awmin Kolasib, Khawzawl, Serchhip leh Hnahthial ah te pakhat theuh a awm dawn a ti bawk.
Mizoram CEO chuan inthlan buaipuitute mi 6400 chuang te chu state level, district level ah leh assembly hrang hrangah master trainer hnuaiah an training a ti a, polling station ven uluk ngai zual 19 awmin venhimna khauh leh felfai tak a awm theih nan CAPF Company 12 ruahman niin company 2 anlo thleng tawh a ti a, a dang company 10 te chu April ni 8 ah anlo thleng dawn tih a sawi bawk.
