Kilometre 51 leh metre 31 a thui Bairabi leh Sairang inkar rel kawng zau chi siam mekah Bairabi leh Hortoki inkar chu rel tlan phal a ni tawh. Rel tlanna atana rel kawng a him tawk leh him tawk loh endiktu, Ministry of Civil Aviation a Commissioner of Railway Safety Sumeet Singhal chuan kilometre 16 leh metre 725 a thui Bairabi leh Hortoki inkar a endikna a a thutlukna hi a siam fel a. Rel tlanna atan a him tawk a ni tih a finfiahna lehkha chu Ministry of Railways-ah Ningani khan a thehlut niin North East Frontier Railways (NFR) thuneitute chuan Zirtawpni khan thuchhuah siamin an tarlang. A endik hnu a thutlukna a siamah Summet Singhal chuan he lai rel kawng hi mihring phur leh bungraw phur rel tan zawh ngam a ni a ti a ni.
NFR thuchhuah chuan Commissioner of Railway Safety hian thla hlui July thla tawp lam khan a endik hna hi a zo tawh niin an sawi a. Bairabi leh Sairang inkar rel kawng siam hna hi tun dinhmunah za zela 90 an zo tawh niin an sawi bawk a. He rel kawng hi hmun 4-ah thenin, Bairabi leh Hortoki inkar, Hortoki leh Kawnpui inkar, Kawnpui leh Mualkhang inkar leh Mualkhang leh Sairang inkar ti a then a ni a. He lai rel kawngah hian rel bungraw phur leh mihring phur chi darkar khata kilometre 75 a chaka tlan theihna turin a him tawk niin Commissioner of Railway Safety chuan a thu thehluhah a tarlang a ni.
He tih lai hian Assam a Hailakandi district-a ruah sur nasat lutuk avangin Silchar leh Bairabi inkar rel kawng chu Hailakandi district-a Killarbak hmunah a chhia a. Ruahpui vanawn hian rel kawng inghahna lei hi hnawlin rel kawng hi metre 200 vel zeta thui a inkhai a. Hemi avang hian rel hmanga Mizoram leh ramchhung hmun dang inkalpawhna chu dan chah rih a ni a. Siamthat leh hun tur hriat a la ni lo.
