Kum 1990 October thla atanga tun tangka kum (2023-24) kal lai mek thleng hian Mizoramah HIV/AIDS vanga nunna chan mi 5,332 an awm tawh. HIV/AIDS avanga thi tawh zinga 3,523-te hi mipa an ni a, 1,722 hi hmeichhia niin 87 hi naupang an ni. Mizoram state AIDS control society (MSACS)-in Integrated Counselling and Testing Centres (ICTC) hrang hrang atanga an lakkhawm a a lan danin kum 1990 October atanga nikum thleng khan HIV hri kai hi mi 31,676 an awm a, an zinga 2,553 te hi nu nau pai lai leh nausen HIV hri kai an ni.
HIV hri kai zinga 26,364 chu kum 2006 atanga antiretroviral therapy (ART) centre-a inziaklut an ni a. ART centre a inziaklut zinga 23,499 hian HIV/AIDS natna veite enkawlna (ART) hi an la tan tawh. ART centre a inziak lut zingah hian mipa 15,738, hmeichhia 9,801 leh naupang 823 an awm a. An zinga mipa 13,985 hian ART an la tan tawh a, hmeichhia 8,766 leh naupang 748 te’n an la tan tawh bawk a ni. Mizorama HIV hri kai hi kum 25 leh 34 inkar an tam ber a, za zela 41 point 59 lai an ni a. Kum 35 leh kum 49 inkarin dawtin za zela 27 point 95 an ni a, kum 15 leh kum 24 inkar chu za zela 21 point 58 an ni.
Naupang kum 14 hnuai lam an tlem ber a, za zela 2 point 75 an ni a, kum 50 aia upa chu za zela 6 point 12 an ni bawk. MSACS project director Dr. Jane Rinsangi Ralte chuan tun hnai thla sawm chhung khan Mizoramah HIV hri kai mi 1,669 hmuhchhuah thar a nih thu leh an zinga mi 1,015 (za zela 60 point 81) zet chu himna lam ngaihtuah lova mipat/hmeichhiatna hman atanga kai an nih thu a sawi a ni.
