Home department hotute sawi dan chuan Myanmar raltlante biometric enrollment kalpuina tur atan hian biometric enrollment portal pawh peih diam a ni tawh a. Sorkar laipui a Ministry of Home Affairs-in kalpui tura an tih hun hun a tipuitling thei turin Mizoram sorkar chu a inpeih tawh a ni. Myanmar raltlante chanchin (biographic) data hi neih kim thawkhat a ni tawh a, lut leh chhuak an awm reng avangin tih kim vek hleih theih a ni lo. Chuti chung chuan an vai deuh thaw-in identity card pek an nih tawh thu home department hotute chuan an sawi a. District 11 a bawrhsap pisa tinin an district chhunga raltlante dinhmun hi an ngaihven reng niin an sawi bawk. Chief Minister Pu Lalduhoma chuan Prime Minister leh Union Home Minister thurawn angin biometric enrollment portal hi peih fel a ni tawh a. Myanmar raltlante chu an rama muanna tluan tling a awm hma chuan kir tir an nih dawn loh thu Union Home Minister Amit Shah hian a tiam niin Pu Lalduhoma chuan a sawi a ni.
Home department-in a chhinchhiah dan thar berah chuan tun dinhmunah Myanmar raltlan hi mi 33,835 an awm a. Siaha district a awm mi 91-te an ramah an kir leh emaw hmun danga an kal emaw avangin raltlan awm zat hi a tlem hret a ni. Raltlan zinga 10,141 hi mipa an ni a, hmeichhia 10,793 leh naupang 12,901 an awm bawk. Myanmar raltlan zinga mi 10,552 hi an puala siam raltlan buk 111-ah an awm mek a, mi 9,269 te erawh chu an chhungkhat laina leh thiante belin an awm a. In luah a awm an awm bawk a ni.
Myanmar raltlan hi Champhai district-ah tam berin mi 14,212 an awm a, Siaha district-ah 5,953 awmin Lawngtlai district-ah 5,922 an awm bawk a ni. Kum 2021 February ni 1-a mipui thlan sorkar thar ding mai tur Myanmar sipai-in thuneihna an hnehchhuh hnu March thla bul atang khan Mizoramah an rawn tlanchhe tan a. Sipai sorkar dodaltute laka sipaiho an inlulin luat avang leh tualchhung indo puan a nih tak avangin a hnu-ah tam tak an rawn luh belh ta zel a ni. MNF sorkar khan biometric data lak kha inthlan vuakvet chhuanlamin a ti duh lova, tunah hian kalpui theih turin ruahmanna siam a ni ta a ni.
