BJP Mizoram chuan Lok Sabha inthlan lo awm tur atana Campaign chu nimin khan Mission Veng Bazarah an hawng a, BJP Mizoram President Pu Vanlalhmuaka chuan Mizoram sum leh pai harsatna sutkian pui turin Mizoram in BJP MP a mamawh a ti.
Pu Vanlalhmuaka chuan India hmarchhaka MP ten an state mamawh hrang hrang an dil chhuak thei a, Mizoram pawhin MP awmze nei, Mizoram mamawh sawi chhuak a Mizoram sorkar harsatna sawioui theu tur BJP MP an neih ve a ngai a ti a, Lok Sabha inthlan lo awm tur ah BJP chu Seat 370 la turin an inbuatsaih mek niin a sawi a, Mizoram pawhin BJP MP an neih theih chuan Mizoram sum leh pai a harsatna lak ata chhanchhuah na turin a pawimawh hle dawn a ti a, BJP leh a thawhpuite sorkar state ah, Budget piah lama sorkar laipuiin sum an pek tu, chu cheng vbc sing 3 chuang nia sawiin, chumi haichhuak tur chuan a chahbi neitu chu BJP a ni a, Mizoram a sum leh paia harsatna sutkian pui turin BJP MP Mizoram in a mamawh a ni a ti bawk.
BJP MLA Dr. K Beichhua pawhin thu sawiin, Mizoram ah BJP hmuh dan a hniam hle mai a, nimahsela BJP kaihhruai hnuaiah India ram chu khawvela Economy thangchak ber zinga mi a ni a, State rethei tak thawhchhuah mumal tak neilo Mizoram tan Sorkar laipui puihna dawn a nih theihna turin a chahbi lo insiam ve a ngai a, MP Election lo awm tur ah BJP Candidate vote theuh turin Mizoram mipuite a sawm tih a sawi a ni.
