National Disaster Management Authority leh State Disaster Management Authority, Disaster Management & Rehabilitation Department-te leh Mizoram chhung District tina Bawrhsap te hmalakna in vawiin khan Mizoram chhung District zawng zawngah chhiatna hrang hrang – leimin, tuilian leh kangmei thlen thulha chet lak dan tur leh hmachhawn dan tur enchhin na, Mock Drill buatsaih a ni. Mizoram hmun tam zawk hi lirnghing nat zawng Seismic Zone – V hnuaia awm niin Mizoram hmar lam hi a hlauhawm zual a, hei vang hian inralrin dan zirna neih a ni thin a ni a. District tinah Bawrhsap te’n District Emergency Operation Centre theuh atangin an vil nileng a. DDMA te chetlak dan hi State Emergency Operation Centre (SEC), DM&R Office, Chawnpui atangin Coordinator Brig. (Retd.) Ravinder Gurung , Sr. Consultant, (ME&IRS), NDMA leh Incident Response Sytem (IRS) – rikrum thila Department pawimawh zuala Officer senior te chuan an lo vil thung a ni.
District Emergency Operation Centre-ah hian Bawrhsap te hi District Disaster Management Authority (DDMA) an nih angin Incident Response System (IRS) – DC Office hotute, Police, I&PR, Medical, Fire, PHE, PWD, PE&E leh Department dang te atanga official te nen an thu a. Chhiatrupna thlenna hmunah hian Incident Commander (IC) hona hnuaiah State Disaster Response (SDRF) Team, NGO te leh rescue worker ten zawnchhuah leh chhanchhuah hna uluk tak leh a tak ang thei ang berin an kalpui a. Tun tum Mock Exercise-ah hian DDMA leh district IRS zawng zawng te hi Coordinator leh State IRS te nen tha takin an inbe pawp thei a. Live Streaming a nih angin inbiak laia signal tha lo vanga chatlak erawh a awm zeuh zeuh thung.
State Level Mock Exercise atan hian hmun 47 thlan chhuah a ni a. Heng hmunah te hian Tuilian, Kang mei chhuak leh Leimin avangin kawngpui tea a chhia, hospitalah kangmei a chhuak a. Lei dawh chim, ram kang leh chenna in chim a, mi tam tak nunna chan, hliam tuar awm bawk bakah harsatna thleng thei dang te pawh en tir niin zawnchhuah, chhanchhuah leh siamthat hna kalpui dan tur te entir a ni. State Emergency Operation Centre hi Pu PC Lallawmsanga, Tamil Nadu DGP (retd), Principal Secretary, DM&R leh Pu Dominic Lalhmangaiha DM&R Director hlui, Consultant, UNDP te chuan Orserver atan a ruat an nih angin an thutchilh bawk a ni.
