Mizoram Police silai keng 1,047 awmna company 15, state pawna inthlan venhimna hna thawka kalte chuan vote an thlak ve thei dawn lo tih a chiang tawh.Chief Electoral Officer (CEO) pisa chuan hemi chungchangah hian Election Commission of India lamin Bihar, Uttar Pradesh leh Madhya Pradesh a inthlanna a duty Mizoram Police-te chuan vote an thlak a remtih loh thu a tichiang tawh niin an sawi a. Ministry of Home Affairs-in ruahmanna a siam angin Bihar leh UP a duty turte hi March ni 28 leh 29 khan an duty-na lam pan turin rel hmangin an chhuak tawh a.
March ni 30 tlai lamah chauh Mizoram Lok Sabha biala ding tur tihchian a nih avangin postal ballot hmanga vote an thlak theihna tura an puala Facilicitation Centre siam hman a ni lova. An duty-na tur hmun pana April ni 3-a rel hmanga chhuak MP a duty turte tana Facilitation Centre siam phalna ECI-a CEO pisa-in a zu dilna pawh April ni 8-ah chauh chhanna hmuh a nih avangin vote thlak lovin an kal ta a ni.CEO pisa atanga thudawn danin hemi hnu hian Mizoram Police mi 1,047-te’n an duty-na hmun theuh atang tal a postal ballot hmanga vote an thlak phalna an zu dil pawh Mizoramah April ni 19-a vote thlak a nih tawh avangin Election Commission chuan a rawn hnawl a.
Hemi avang hian Mizoram pawna inthlan duty-a kal State Armed Police Force (SAPF)-te chuan Mizoram Lok Sabha inthlanna-ah vote an thlak ve thei dawn ta lo a ni. Political party thenkhat chuan hei hi pawi an tih thu sawiin Mizoram ang vote nei nuai 8 chuang hret chauh awmna-ah chuan inthlan result tidanglam pha niin an ngai a. Chubakah vote tlak chhiat chhanah an puh bawk a. Kumina Mizoram Lok Sabha bial inthlanna-ah khan vote za zela 56 pont 87 chauh a tla a, hei hi hun hma lam ngaihtuah chuan a tla chhe hle a ngaih a ni.
