Mizoram Lok Sabha inthlan April ni 19-a vote thlak turah vawiin khan Mizo National Front (MNF) Candidate Pu K. Vanlalvena, Congress Candidate Pu Lalbiakzama leh BJP Candidate Pu Vanlalhmuaka te’n chuh turin hming an pe lut. Vawiin hi Candidate-te nomination theh luh hun tawp ni a ni a; ZPM Candidate Richard Vanlalhmangaiha, PC Party Candidate Pi Rita Malsawmi leh Independent Candidate Pu Lalhriatrenga Chhangte ten hming an lo pe lut tawh a ni.Nomination file zawhah chanchinbu mite zawhna chhangin MNF Candidate Pu K.Vanlalvena chuan ram, hnam leh sakhua a him theihna turin nasa zawka tan lak a tum dawn thu a sawi a. Tun parliament kal mekah a chhung leh pawnah nasa taka au a tul avangin hetianga au thei tur hian Lok Sabha MP seat chu a chuh a ni, a ti a. Rajya Sabha MP a nih laia a hnathawh en chungin Mizoram mipuiten vote thlak se a duh tih sawiin Mizoram mamawh chhhanna ni dawna a inhriat vangin a ding chhuak tih a sawi.
NDA lama a thut tur chungchang sawiin Pu K. Vanlalvena chuan hei hian Mizo mipuitea vote an zawnna kawngah nghawng a neih a rin loh thu a sawi a. NDA lam thu tur BJP President Pu Vanlalhmuaka pawh a hranin an ding ve tho tih sawiin NDA chu party 45 inzawmkhawm an ni, a ti a. Kristian state Nagaland leh Meghalaya-ah NDA thawhpui an sawrkar mek tih sawiin NDA chhung ngeiah BJP thil tha lo tih duh lotu tam tak an awm a ti a; pawn lam atanga do aia chhung lam atanga do a tha zawk tih hrechiangtu a ni tih a sawi bawk. Congress Candidate Pu Lalbiakzama chuan sakhaw zalenna bo ta leh hnam hnufual leh tenau zawkte palzutna tam lutuk tibo tura hmalak a tum thu a sawi a; Party ang pawhin an beiseina a sang hle tih sawiin BJP-in UCC pass an tum chu Mizoram tan a him lo a, India khua leh tui zang zawng an intluktlan nan theihtawpa bei turin a ding chhuak a ni, a ti.
BJP MP Candidate Pu Vanlalhmuaka chuan kumin Lok Sabha MP inthlanpuia BJP Mizoram thupui chu ‘a hmasa berah Mizoram’ a ni, a ti a. Hmarchhak state 7 zinga state 4 te chuan Central Minister an nei tawh a. Mizoram, Meghalaya leh Nagaland chu a nei lo an nih avangin Mizoramin BJP MP a nei a nih chuan Cabinet Minister a nih theih thu a sawi a. MP-a thlan tlin a nih chuan hmasawnna chu Mizoram chhungah mamawh a nihna anga pek a nih tur thu te, BJP-ah duhsak bik awm lovin state mamawh ang zela hmasawnna pek thin a ni, a ti a. NDA-ah pahnih thru an awm loh bakah BJP chu NDA neitu a ni a, BJP Mizoram awmchhan chu Mizo hnam leh sakhua himna atan a ni, a ti.
