Mizoram-in Lok Sabha-a seat a neih chhun hnawh khah nana kumin April ni 19-a vote thlak te boruak muanawm tak hnuaiah chhiar zawh a ni ta a. State-a ro rel lai Zoram People Movement (ZPM) Candidate Pu Richard Vanlalhmangaiha chu hneh taka thlan tlin a ni.Puan tawh angin vote hi tukin dar 8 atang khan chhiar tan a ni a. Election Commission of India (ECI)-in a tarlan dan chuan Zoram People’s Movement (ZPM) Candidate Pu Richard Vanlalhmangaiha hian Vote Nuai 2 Sang 6 leh 377 hmuin thlan tlin a ni a. Amah hnaih bertu MNF Candidate Pu K. Vanlalvena’n Vote Nuai 1 Sing 3 Sang 9 leh 532 hmuin an inthlauhna hi vote 66,845 a ni. Indian National Congress (INC) Candidate Pu Lalbiakzama’n vote 97,761 a hmu a; Bhratya Janata party (BJP) candidate Pu Vanlalhmuaka’n vote 33,009 a hmu a, Mizoram People’s Conference (MPC) candidate Rita Malsawmin’ vote 3681 hmuin Independent Candidate Pu Lalhriatrenga Changte in vote 4663 a hmu a, thlan tur bik hre lo mi 1,866-in NOTA an hmet a ni.
Lok Sabha MP atana thlan tlin ZPM Candidate Pu Richard Vanlalhmangaiha’n a beisei aiin vote a hmu tam, a ti a. Vote inthlauhna sang taka thlan tlin a ni chu mipuiten ZPM Sawrkar Pu Lalduhoma kaihhruai an rin zia tilangtu, a ni a ti. Akashvani Palai nen an inkawmnaah he thu hi sawiin Pu Richard Vanlalhmangaiha chuan vote sing 2 vela chak a lo inbeisei laia vote sing 7 dawn laia hnehna a chang chu lawmawm a tih thu a sawi a, mipuiten sawrkar kal lai mek chungah rinna an nghat tih lantirna a ni, a ti a. Hmasawnna hrang hrang thawk tura a lo intiam angin theihtawp a chhuah chhunzawm dawn tih sawiin, sawrkar aiawh tur a nih angin Mizoram sorkar chu tha taka thawhpui tur a nih avangin sawrkar laipui lama project theh luh tawhte bawhzui chu a hmalakna hmasa a ni ang, a ti.
Pu Richard Vanlalhmangaiha chuan sawrkar laipui chu a thu azira an thlawp tur thu sawiin zawm bik an nei dawn lo, a ti a. Mizoram tana tha turah chuan a rem dan danin thawhpui an tum dawn a ni, a ti bawk.
