Aizawl Bawrhsap Pi Nazuk Kumar chuan vawiin khan Aizawl DC Conference Hall-ah chanchinbu mite a kawmnaah chuan Mizoram Lok Sabha intlanah hian a vawi khat nan pianphunga rualbanlo (PwD) hlangin an vil polling station pakhat siam tum a ni a ti a, hei bakah hian hmeichhe hlangin an vil polling station a awm leh dawn a, Aizawl district-a assembly bial tinah tinah pali zel dah a ni ang, a vaiin 48 awm tura ruahman a ni a ti.
Rualbanlo leh kum 85 chin chung lam ten anmahni chenna In a vote an thlak theihna turin ruahmanna siam a ni leh bawk a. District Election Officer Pi Nazuk Kumar chuan MLA inthlanah vote a tla tha thin tih sawiin, Lok Sabha inthlanah erawh India ram pum thlirin Mizoramah vote a tla tha tawk lo thin chu pawi a ti a, kuminah hian vote thla tha se a duh thu a sawi bawk.
Inthlanna a mawhphurhna nei tur team hrang hrangte training chu pek zawh thawkhat a ni tawh a. Polling party te training thawhkhatna hi March ni 26 leh ni 27 hian neih tum a ni a, Master Trainers 24 ten training an pe dawn a. Inthlanna atana hman tur khawlte hi endik zawh tawh niin District Strong Room-ah dah mek an ni a.
Election-a candidate-te sum hman dan ngun taka vil turin Assistant Expenditure Observers, Flying Squads (FS), Static Surveillance Teams (SST), Video Surveillance Teams (VST), Video Viewing Teams (VVT), Accounting Teams, Media Certification & Monitoring Committee te dah an ni a, heng bakah enforcement agencies hrang hrang ten inthlanna muanawm leh felfai tak a nih theih nan an vil dawn a ni. Puan tawh angin Mizoram Lok Sabha inthlan vote thlak ni atan April ni 19 ruat a ni a, inthlan hriattirna hi naktip ni 20 ah tihchhuah a ni anga, inthlan chuh tumte tan ni 27 thleng hun hawn a ni a, ni 28 ah chuh tumte hming endik a ni anga, ni 30 hma in inhnukdawk duhte tan hun hawn a ni. Vote tla hi ramchhung hmun dang rualin June ni 4 ah chhiar a ni ang.
