Kum 2021-22 tangka kum chhunga Mizoram leibat tlingkhawm cheng vaibelchhe 10,570 leh nuai 93 chu kum 2022-23 khan cheng vaibelchhe 10,972 leh nuai 49 in a pung chho. Mizoram Principal Accountant General in kum 2022-2023 chhunga Mizoram sum dinhmun an endikna atanga an hmuhchhuah dan chuan, tun hnai a thuchhuah an siam dan chuan Mizoram leiba (outstanding liability) hi a pung zawngin a kal a. Kum 2022-23 chhunga Mizoram sum thawhchhuah atanga chhuta za zela 3 point 37 chu sum indaih lohna a ni a. Sum thawhchhuah atanga chhuta leiba awm hi za zela 33 point 42 zet a nih avangin Mizoram Fiscal responsibility and Budget Management (MZFRBM) Act danin a phut chu a pha thei lo a ni.
Hemi hun chhung vek hian hmasawnna hna 291 thawh nan cheng vaibelchhe 2,552 leh nuai 59 hmang chungin hna hi department hrang hrangin an thawk zo thei lova. Hemi avang hian hmasawnna hna thawhte hi hman tangkai a ni thei lova. Zawh hun tur bituk anga thawh zawh loh hi kum 1 atanga kum 5 zet te a ni hlawm a. PHE, Power leh PWD-in hna an thawh zawh loh avanga sum sen belh ringawt pawh cheng vaibelchhe 87 leh nuai 19 a tling a ni.
Kum 2022-23 tangka kum chhung khan chhiat rupna thleng thin pualin sorkar laipui atangin State Disaster Response Fund (SDRF) hnuaiah Mizoram sorkar chuan cheng vaibelchhe 39 leh nuai 20 a dawng a, Mizoram sorkarin a do let vena tur chu cheng vaibelchhe 4 leh nuai 36 a ni a. Mahse, heta sum ruahman a vaiin cheng vaibelchhe 43 leh nuai 56 hi SDRF-ah Mizoram sorkar chuan a chhunglut lo a ni.
