Mizoram leh Assam palai nimina inbia ten state pahnih inkarah remna a awm zel theih nan hmalak chhunzawm zel an rem ti a, kuhva ro tawlhruk chungchangah ngaihnathiamna neiloa hmalak dun an rem ti bawk.State pahnih aiawhte inbiakna hi nimin khan Mizoram State Guest House, Chaltlang ah neih a ni a, Mizoram lamah Home Minister Pu K. Sapdanga’ n kaihhruaiin Assam lamah Border Protection & Development changtu Minister Atul Bora chuan a rawn ho a, state pahnih ten thuchhuah intawm an siam ah ramri buai hun rei tak chhung lo awm tawh chu chinfel ngei ni se an ti a, ramriah remna leh muanna vawn chhunzawm zel ni se tiin thil duhawmlo a thlen loh nan hmalak chhunzawm an rel a, Ramri hnaih District thuneitu ve ve te’n a khat tawkin Joint Cultural and Sports Festival-te buatsaih thin se tiin hemi tur hian January ni 31, 2025 ral hma ngeia hmalak ni se an ti bawk. Inkawm zawha thuthar thehdarhtute an kawmna ah Mizoram Home Minister Pu K. Sapdanga chuan ramri chungchanga Mizoram leh Assam inrem hun tur hriat ni lo mahse inremna tluantling a awm ngei a beisei a ti a, ramri chungchanga inremna a thlen hma loh chuan ramri chhehvela District thuneitute hma la se an ti a ti a, boruak a tha zawnga a awm theih nan hmalak an rel tih sawiin sawrkar thuneituten inbiakna chhunzawm zung zung turin an rel a ti a, March ni 31, 2025 ral hma ngeia Minister level inbiakna chu neih hman ngei ni se an tih tih sawiin a hmun atan Guwahati a ni dawn a ti bawk.
Assam Minister Atul Bora chuan Akashvani palai zawhna chhangin an inbiakna chuan rah tha a thlen ngei a beisei a ti a, state pahnih ten remna duhin dawhkan khat an kil tih sawiin ramriah thil duhawmlo a thlen loh nan hma an la tlang a ti a, state pahnih ten kuhva ro tawlh ruk do kawngah hma an la dun dawn tih sawiin inremna tluantling a awm theih nan ramri hnaih ah pawh hmalakna kalpui zel an tum dawn tih a sawi bawk. Thuchhuah intawm an siam ah hian Assam leh Mizoram inrina bialtu Deputy Commissioner-te leh Superintendent of Police ten ramri hrulah remna leh muanna a awm reng theih nan thla tin virtual meeting neih rem tih a ni a, thla 6 dan ah dawhkan kil a thutkhawmna nei thin tur a rel a ni. Heng bakah hian State pahnih a palaite hian ramri buaina chinfel kawng ah ramri hrul a chengte an pawimawh zia hria in an ni nen a tha taka thawhho a tul tih an pawm a, ramri kaihhnawih buaina leh harsatna a awm reng rengin ramri hrul a cheng mipuite leh a kaihhnawih zawng zawng ten anmahni thu a hma la nghal mai lovin thuneitute hnen ah thlen thin se tih an rel bawk.
Nimina Aizawla State pahnih hruaitute inbiakna hi kum 2022 November ni 17-a Guwahati a an inbiak hnua an inbiak lehna hmasa ber tur niin, ZPM sorkar hnuaia ramri chungchang sawihona hmasa ber a ni a, Puan tawh thin angin, kum 2021 July thla khan State pahnih te hi ram inchuh avanga intibuaiin, silai hial hmehpuah a nih phah a, state pahnih te inrem theih nan vawi engemawzat inbiak tawh niin nimina an inbiak hi kum 2021 hnua vawi 4 an inbiakna a ni.
