Naktuk atanga tan tur Mizoram LegislativeAssembly inkhawm (budget session) atan sorkar dan siam tura duan thar pathum a lut tawh a, heng zingah hian Higher & Technical Education Department atanga thehluh Mizoram state University Bill a tel. Assembly Secretariat atanga thudawn danin Mizoram state University Bill bakah hian sawrkar dan siam tura duan thar LESDE atangin The Mizoram Private Placement Agencies (Regulation) Bill, 2025 leh UD&PA atangin The Mizoram Urban & Regional Development Bill, 2025 te thehluh a ni tawh a, He’ng bill pathum bakah hian Finance department atangin dan siamthat tur The Mizoram Goods & Service Tax (First Amendment) Bill, 2025 chu thehluh a ni tawh bawk.
Official Resolution pakhat lut tawhin, heihi environment, forests & climate change minister Pu Lalthansanga’n assembly pawmpui tura a putluh tur a nih thu dawn a ni a. Hei hi Parliament-in dan a lo pawm tawh “The Water (Prevention & Control of Pollution) Act” Mizoram assembly in a lo pawmpui (ratify) vena tur ni a thu dawn a ni. Mimal thehluh (private resolution) 85 a lut tawh a. Zirtawpni hi Private member-te puala hun hman thin a nih lai-in tun assembly session-ah hian Zirtawpni vawi khat February ni 21 bak chu Zirtawpni apiang chawlh a nih dawn avangin hun a awm dawn lova.
February ni 21-ah pawh hian Prime Minister hlui Dr. Manmohan Singh sunna hun bakah larsap thusawi lawmthu sawina motion sawiho ni tur a nih dawn avangin hun a tlem hle dawn a ni. Zawhna hi House chhunga chhan chi (starred question) 817 leh ziaka chhan chi (unstarred question) 96 a lut tawh a. House dawhkana dah tur lehkha pawimawh 5 a lut tawh bawk.
