Fisheries Minister Pu Lalthansanga’n Mizorama sangha chi supply kawngah hleih neihna tam tak awm thin leh sangha note tam tawkloh avangin sangha tharchhuah a tlem phah tih a sawi. He thu hi vawiina Assembly thutkhawma zawhna leh chhanna hunah sawiin Minister chuan tun hma in sangha chi supply kawngah hleih neihna tam tak a awm thin a ti a, heng hian sangha pun theihna tur nasa takin a pawt hniam tih sawiin sangha chi supply chu ngun takin an ennawn dawn a ti a, sangha tharchhuah a tam tawklohna chhan chu sangha note tam tawkloh vang ani tih a sawi bawk.
Minister chuan tha takin department in hma a la dawn tih sawiin Kum 2023-24 inkarah District Level Committee Reconstitute ani dawn a ti a, a ti tak tak peih te hnenah chauh sangha chi pek ani tawh dawn a, hei hian Mizoramah sangha tharchhuah a tih pun phah ngei an beisei a ti a, Thenzawlah Hatchery bun tum mek ani tih sawiin sangha tharchhuah a tam theih nan theihtawp chhuah ani tih a sawi.
Pu Lalthansanga chuan sawrkar hmasa in kum 2019 atanga kum 2023 inkara sangha dil tanpuina mi 3902 hnenah a pe chhuak a ti a, sangha man chhuah zawng zawng leh dila awm mek chu sangha tharchhuah chhut dan a ni a ti a, Mizoram ah sangha thar chhuah a tam theih nan department in nasa takin hma a la mek tih a sawi.
