Sorkar laipui-in India leh Myanmar inkar ramri km. 1,643 a thui hung chungchangah Arunachal Pradesh leh Manipur sorkarte Ministry of Home Affairs-in tun hnai a na taka a nawr lai-in Mizoram sorkar erawh chu a nawr na ve vak lo ni a hriat a ni a, nawr hauh lo erawh chu a ni lo. Home department hotute hnen atanga thu dawn danin Ministry of Home Affairs hian hun hma lam deuhah khan Mizoram leh Myanmar ramri km. 404 a thui hung tur hian a rawn ti a. Sorkar hmasa leh tun sorkarin a dodalna-te chu Ministry of Home Affairs-ah thawn thlak ve ve a ni. MNF sorkar lai khan council of minister thukhawm chuan ramri hung an dodal thu hi thutlukna an lo siam tawh a. ZPM sorkar pawhin dodal chhunzawm zelin assembly-ah ramri hung an duh loh thu hi sorkarin pulutin assembly chuan lungrual takin a lo pawm tawh a.
Hemi chungchangah hian home minister Pu K. Sapdanga chuan kumin February ni 28 khan Myanmar nena zalen taka inkalpawh tawn theihna tihtawp leh ramri hung tura thutlukna dodalna official resolution chu assembly inkhawmah a pulut a. He resolution hi lungrual taka pawm a ni. He official resolution-ah hian zalen taka inkalpawhna titawp lova ramri hung bawk loh bakah ramri tawn tawna awm Mizote inzawmkhawmna atana thawk zawk turin sorkar laipui chu an ngen nghal a ni.
Union Home Minister Amit Shah chuan kumin February ni 6 khan sorkar laipui-in Myanmar leh India hmarchhak state 4 – Arunachal Pradesh, Nagaland, Manipur leh Mizoram ramri chu hung a nih dawn thu leh zalen taka intlawhpawh theihna dan pawh hlih a nih thu a puang a. Hei hi Mizoram leh Nagaland sorkar bakah pawl hrang hrangin an dodal nghal a. Mizoramah chuan tlawmngai pawl inzawmkhawm NGO Coordination Committee chuan larsap kaltlangin Union Home Minister hnenah hian sorkar laipui thutlukna an dodal thu an thawn nghal a ni.
Economics lam mithiamte chuan ramri a zalen taka intlawhpawh theihna hlih leh ramri hung hian Mizoram leh Myanmar ramri a cheng mi tam tak ei leh bar bakah sum leh pai dinhmun a chhe zawngin a khawih nasa hle dawn niin an sawi a. A bik takin Champhai district a ramri a insumdawnna hmun Zokhawthar leh Myanmar lama chengte bakah ramri a insumdawn tawnna dang ‘border haat’ chhawr tangkaitute chuan eizawnna kawngah harsatna an nei nghal dawn a. Mizorama chengte bawngsa ei za zela 90 chuang hi khilam atanga lakluh a nih avangin Mizoram pumin harsatna a tawk nghal bawk dawn a ni an ti. Ramri hung a nih chuan Mizoram lam ramri a chengte’n Tiau lui kama an nul-te enkawl thei lovin Tiau lui sangha hmanga eizawngte pawhin harsatna an tawk nghal dawn niin an sawi a ni.
