Vawiin khan Mizoram CSR Cell te chu an Chairman Pu TBC Lalvenchhunga, Adviser to CM (Planning & Finance) hovin a office-ah an thukhawm. Meetingah hian tun thla ni 13-14 a Bangalore-a Stakeholder Consultation Meeting, UNDP te nena tangkawpa an zu buatsaih chungchang thlirletna leh a bawhzui dan tur an rel. Kha an programme ah khan Mizorama CSR hmanga hma rawn la duh corporate foundation 15 leh Civil Society Organisation 12 te an tel a. Heng CSR pe thei foundation hrang hrangte kal dan leh an hmalakna huangte hi Mizorama CSR chhawr thei pawl leh sawrkar agency, Income Tax Act hnuaia registration nei leh registration dil mek te hnena kimchang taka hrilhhriatna hun buatsaih thuai ni se, an ti a. December hapta hnihnaah buatsaih an tum.
Awareness programme-ah hian CSR Cell hnena in report tawh pawl hrang hrang te bakah sawm tur chi nia an hriat dang te an chhinchhiah a. Sawmna dawng lo, hetiang lam hmalakna kalpui thei kan lo awm a nih chuan phone number 9862868510, CSR Cell Member Secretary hnenah a ranglam in report tur a ni. Awareness buatsaih zawhah Consultation Meeting, Bangalore-a an zuk hmuh Foundation leh CSOs te ko chhovin inzawmna neihtir dan an ngaihtuah leh dawn a ni.
Meeting hian Mizoram sawrkar agency thenkhat hnenah CSR an bawhzui theih tur chi nia an ngaih thenkhatte thawn ni se an ti bawk.
