Chief Minister Pu Lalduhoma chuan hmunphiah lei chungchangah an tum anga an kal loh thu sawiin, sorkar rate tiam angin lei mahse, beisei an pha ta rih lo tih vawiina ZPM Gen Assembly vawi 1-na a hmanpui na ah a sawi.
Vawiina ZPM Gen Assembly vawi 1-na ah thusawiin, Chief Minister chuan Mizoram-a hmunphiah thar chhuah te chu an rate siam anga lei ngam an awm a ti a, hmunphiah thar chhuah te lei tur in firm pakhat nen an inbiak rem tawh a, hmunphiah leitu tur chuan Mizo hlawhfa tur a hmu zawh loh avangin, hnam dang chhawr an ngai tih sawiin, chung hnam dangte tan chuan ILP a ngaih avangin hnathawktu indaihlohna chuan a thawh tam tir thei lova, amaherawhchu an tuam chinah chuan sorkar rate angin a la lei zel a, hmun hla tak taka hmunphiah ching ve te ta chu an lei thei ta lo a ni a ti.
Chief Minister chuan a pumpuia lei vek thei tura ngaih a ni mahse, hmunphiah season a rei lo bawk nen thawktu tam tak a ngai tih hriat chian a ni ta tih sawiin heivang hian an thlen phak lohna a hmunphiah te chu mahni hmun zelah mahni thiam ang anga lo dehral mai ni se tiin thutlukna siam tih a sawi. Hetihlai hian MNF Party chuan ZPM sorkar beiin, MNF kaihhruai Sawrkar kalta khan kuthnathawktute tan tiin SEDP ah Vbc 150 a dah diam tawh chu tun sawrkar ZPM kaihhruai hian sawrkarna an chan hnu lawkah pawt pengin, he sum hi Thlai thar lei nan tiin Vbc 110 a dah a, hmang duh lovin, Hmunphiah lei tur hian RR Associate chu a inremsiam pui chu beisei angin an thlenpui lo a ni an ti a, ZPM hian Inthlan dawna mipui hmaa an inzawrh ang ngei khan Hmunphiah hi lei thuai turin MNF chuan a phut a ni an ti.
