Chief Minister Pu Lalduhoman sorkar laipuia Ministry of Finance Minister of State, Dr. Bhagwad Karad chu a chenna inah a kawm a, Mizoram mamawh hrang hrang a sawipui. Chief Minister hian central sawrkarin Interim Budget atanga lang SASCI atan sum tam zawk ruahman a tum chu lawmawm a tih thu a Minister of State hi hrilh a. Mizoram tana a kalpui dan awlsam zawk awm thei se a duh thu a thlen a. 16th Finance Commission funding dan turah pawh, chhiah lakkhawm tur nei tam lo tak a nih avangin Mizoram chu special category state a la dah chhunzawm zel turin a ngen a ni. Chief Minister chuan Mizoram Rural Bank chu Mizorama bank inzarpharh zau ber leh mipuite pawhin an chhawr nasat a nih thu leh, CD Ratio pawh nei tha thin tak a nih thu a hrilh bawk a.
Hei vang hian a sponsor bank, SBI-a thawktute allowance zat pek ve ni se tha a tih thu a thlen a. Mizorama bank awmte, a bikin Regional Rural Bank ten thawktu indaihlohna a tawrh nasat avangin Mizoram tan emaw India hmarchhak puala thawktu tur lak runpui, special recruitment kalpui turin a ngen bawk a ni. Chief Minister hian, Mizoramah private bank te Mizoram hmun hrang hrangah an inzarpharh tawk loa a hriat thu leh, hei vang hian mipuiten an chhawr tangkai theih tawk loh thu a sawi a. Hei bakah hian Mizorama private bank hrang hrangte tihchangtlun dan tur a sawi pui bawk a, Mizoram Development Bank din theih dan tur te pawh a sawipui a ni.
Dr. Bhagwad Karad hian Chief Minister thu thlen te chu a awm laia sawiho turin a kaihhnawih hotu pawimawh te telna tur thutkhawm tun thla ni 16-a tan a ko nghal a ni.Pu Lalduhoma chuan Delhi-ah Union Minister of Health & Family Welfare Dr. Mansukh Mandaviya pawh a hmu a, ZMC chungchang a sawipui a. ZMC final inspection neih a hnai tawh a. A hma atang tawhin a tehnaah a tling hlei thei thin lova. Hei vang hian Chief Minister hian Mizoram chu ram kilkhawr leh mihring tlemna a nih avanga a endikna danah ngaihhnathiamna thenkhat pek a dil a, Minister hian a lo remti a ni. ZMC kalpui na tur special package pawh Lok Sabha inthlan Model Code of Conduct puan hmaa pek chhuah hman tum a ni a, ZMC chungchang rel turin Union Minister hian meeting a ko nghal vat dawn a, Mizoram sawrkar aiawha kal tur pawh ruat fel nghal tih sorkar thuchhuah ah tarlan a ni.
