Sorkar laipui hnuaia Central Seat Allocation Board hotute chuan Mizo thalai tam zawk India rama zirna in tha-a an luh theih nan puih an inhuam reng thu an sawi.
He thu hi nimina Aizawl Press Club-a thuthar thehdarh tute an kawmna-ah sawiin CSAB hotute chuan Hmar chhak zirlaite’n India rama zirna in tha National Institute of Technology hnuaia NIT+ system hnuaiah seat 2000 chuang an neih an beisei thu an sawi a, Mizo zirlai a bik takin science leh technical lama kalte chu Joint Entrance Examination (JEE) 2025 hmachhawn tur leh hemi atana an hming pe lut theuh tura an duh thu an sawi bawk.
CSAB hotute chuan Mizo zirlaite chu rampum anga chhut pawh a thiamna leh theihna nei tha tak an nih thu sawiin, tumruhna leh thawhrimna nena India ram chhung zirna in tha a lut ve ngei tura an duh thu an sawi a, hemi kawnga an inbuatsaihna ah harsatna leh hriatthiam loh an nei a nih chuan an tan an awm reng thu an sawi a, councelling pawh hmarchhak zirlaite tan an hawn thu an sawi bawk.
