Mizo Territorial Army dinna tura hmalakna kal zelah vawiin khan Coordination & Land Search Committee member te chuan Committee Chairman Lt. Col. Clement Lalhmingthanga, MLA hovin Mizo Territorial Army awmna tur atan Bellei Tlang, Lungleng, Aizawl District chu a hmunah an enfiah.
Mizo Territorial Army hi a bul tan nan Company hnih (2) din phawt tura ruahman a ni a. MTA hmunpui tur atan hian hmun hrang hrang enkual chhoh mek a ni a, chutih laiin Lungleng rama Bellei Tlang hi remchang hlea hriat a ni a, amaherawh chu Coordination & Land Search Committee chuan uluk leh zau zawka sawiho leh ni se tha a ti a, a tul ang zelin Lungleng khawtlang hruaitute nen sawiho tura ruahmanna siam a ni.
Chairman Lt. Col. Clement Lalhmingthanga, MLA hi Coordination & Land Search Committee member – Home Department, Revenue Department, Sainik Welfare & Settlement leh Mizoram Youth Commission aiawh official-ten an tawiawm a ni.
