Raymond Remlalmuana (Raymond Colney) leh Andrew Vanengmawia (Drew Pachuau) te chu Asia khawmual a Film Festival hriathlawh leh lian pawl ber te zinga ami – Korea a Busan International Film Festival vawi 28-naah tel turin zaninah Delhi atangin Korea an pan dawn a. An pahnih hi Mizoram aiawh turin Information & Public Relations Department in an thlang a, an kalna tur senso zawng zawng chu Ministry of Information & Broadcasting leh National Films Development Corporation (NFDC) in an tum vek dawn a ni.
Busan International Film Festival a tel turin Hmarchhak state tin atangin film siamtu (film maker) 2 theuh thlan a ni a. 2023 pawh khan Ministry of Information & Broadcasting chuan Hmarchhak state tin atangin film maker 2 theuh Cannes International Film Festival chhim turin an lo hruai tawh a. Chumi tum chuan Napolean RZ Thanga leh Aldrin Zosangliana te an zuk kal a ni.
Busan International Film Festival hi October ni 2, 2024 khan tan niin October ni 11 ah a tiak dawn a, Hmarchhak film maker te hian ni 5 chhung Festival an chhim dawn a ni.
