Taxation Minister Dr Vanlalthlana’n Mizoramah GST pe lo leh pe dik lo an tam tih sawiin Kristian taka tha taka chhiah pe thin turin Mizo mipuite a ngen tih a sawi.
He thu hi nimina tuialhthei man sang chungchanga thuthar lakhawmtute a kawmna ah sawiin Minister chuan mipuite tanrual puiah sawmin GST lak chungchangah thil diklo ti an awm chuan department ah hriattir zel turin a ngen a ti a, Midang enkawl (rendering of services) departmental work atangin chhiah, goods & services tax (GST) lak tan anih thu a sawi a, kum 2019-a Mizoram sawrkarin composition scheme a siam angin GST hi lak ani dawn tih a sawi.
Dr Vanlalthlana chuan sawrkarin GST leh professional tax ah huang a zauh mek thu sawiin Estimate a awm tawh reng si, chhiah pek loh ang chi kha sawrkara lak luh dan an ngaihtuah a ti a, departmental work hnuaia mi dangin hna an enkawl sak (rendering of services) atangin GST lak ani tawh dawn a, GST chu cheng nuai 10-50 inkarah 6% lak ani dawn a, cheng nuai 50 chung lamah 18% lak ani dawn tih sawiin department in an thawk anih chuan GST lak ani dawnlo tih a sawi.
Departmental work atanga GST lak chu dan hnuaiah fimkhur taka an kalpui thu sawiin Minister chuan Schedule of Rates hmangin department te chuan an hna tur an chhut thin a ti a, SoR ah chuan GST a tel vek tih a sawi.
Thla liam ta August ni 21-a Mizoram Legislative Assembly thutkhawmah The Mizoram Goods and Services Tax (Amendment) Bill , 2024 hi passed a ni a, Minister hian hemi chungchanga a sawina ah Input Service Distributor siamthat a ni tih sawiin thil siamchhuaktuten an thil siamchhuahna khawl an register loh emawa hremna awm thei tarlan ani a ti a, Input Tax Credit a awm thar dawn tih sawiin hei hian state danga office nei ten hmun danga GST anlo pekin Mizoram lamah an an pek tlem theihna tur ngaihtuah sak anni dawn tih a sawi.
Minister chuan GST Act chu central leh state in thuneihna insemzai hmanga a kalpui a ni a ti a, central GST act chu 2017 atanga hman tan niin central emaw state in mahni duhdana lo siamthat ngawt theih a nilo tih a sawi bawk
