Chief Minister Pu Lalduhoma chuan Aizawl district Settlement pisa chu mipuite mamawhna avangin Aizawl North leh Aizawl South ah then a ni dawn a ni, a ti. Land Revenue & Settlement department awlsam taka mipui-in an dawr theihna tur online service portal, e-ram ti a vuah (Development of Comprehensive & Integrated GIS based System for Maintenance and Management of Land Records in Mizoram portal) a hawnna-ah he thu hi sawi-in Pu Lalduhoma chuan ram buai tam takte rang zawka ngaihtuahtu tur Revenue Court siam a nih dawn thu leh surveyor indaih lohna avanga mipui harsatna sutkian na’n empanel survey firms system kan kalpui a nih dawn thu a sawi a. He’ng thil tihpuitlinna tur atan hian sorkarin hriattirna a chhuah tawh thu a sawi bawk a ni.
Chief Minister chuan, sawrkar leh mipuite inkara indawrna awlsam zawk, hun leh tha heh lo zawk, rang zawk leh huapzo zawk neih an duh tih sawiin chu chu kalphung thar mipui sawrkar zia a ni. Sawrkarna an chelh tan ni-ah Right to Public Services Act chu tha zawka kalpui tur leh chumi kaltlanga service tam zawk pe turin an intiam niin a sawi a. Ni za chhungin an tihlawhtling niin a sawi bawk. Mipuite’n an lungawi lohna an thlen zung zungna tur Public Grievances & Redressal portal changkang tak – Mipui Aw thar pawh an hawng bawk tih a sawi a. Hun a lokal leh deuhva, Sustainable Development Goals Dashboard leh Project Monitoring Committee Dashboard an hawng leh a. Vawiinah mipuite dawr nasat em em Revenue hmalakna tichaka tiawlsamtu tur e-ram an hawng leh ta a ni, a ti.
He e-ram portal hi Ministry of DoNER, Science & Technology Section sum cheng vaibelchhe 6 leh nuai 4 atanga thawh niin, a bul tan na’n hian pilot project angin Aizawl district hnuai a ram chhinchhiahna (land records) leh leh thil kal mekte kalpui phawt a ni ang. In hmun dilna, periodical patta, land lease, house site leh hming thlakte a bul tan a ni ang a. A tahtawlin Revenue Department service 27 te chu he portal-ah hian bilh tel vek tura ruahman a ni. A portal address chu eram.mizoram.gov.in a ni a, a hmang thiam lo te tan Common Service Centre (CSC) kal tlanga hman theih a ni dawn a ni.Land Revenue & Settlement minister Pu B. Lalchhanzova, pawhin thusawiin, he hmalakna hi sorkar hmasa-in bul a lo tan tawh a nih thu leh. An theih ang angin an umzui a, siam that chhoh zel ngai tam tak a la awm ang tih hre chungin an hawng ta phawt a ni, a ti a ni.
