AICC National Spokesperson Matthew Antony chuan loneituten hun rei tak an ngiat tawh Minimum Support Price chu kumin Lok Sabha inthlan lo awm tura sawrkarna an chang anih chuan I.N.D.I.A ngaih pawimawh ber a ni dawn tih a sawi. He thu hi vawiina Aizawl Press Club a thuthar thehdarhtute a kawmna ah sawiin AICC National Spokesperson chuan sawrkar laipui BJP Sawrkar chuan lo neitute laka an thuthiam chu ti hlawhtling lo in beisei an phaklo mek a ti a, lo neitu lungawilohna lantir mek te khawpui luh phalsak lo in dan chep mek an ni tih sawiin heng te hi an thil phut an tihsak duhloh vang a ni a ti a, an sawrkar dawnah mipui hnena an intiam ang an hlen lo tih sawiin heng hi mipuiten an theihnghilh lo tih a sawi.
Matthew Antony chuan Sawrkarna fawng vuan tute chu an intiamna an theihnghilh vek tawh a ti a, ramchhungah lehkhathiam hna hmulo tam tak awm belhin kum 45 hnua a san ber tum a thleng mek a ti a, lo neitute sum lakluh a let hniha tihpun tiamtu chuan kum 10 ral hnuah engmah a thlen tir lo tih sawiin lo neitute sum lakluh chu thil man sang zel leh nunphung hautak avangin a tlahniam char char zawk tih a sawi.
AICC Spokesperson chuan BJP sorkar hnuaiah India ram leiba a let thumin a pung tawh tih sawiin kum 2014 a India leiba neih cheng vaibelchhe nuaih 55 chu cheng vaibelchhe nuaih 185 ah a pung chho tawh a ti a, Sawrkar laipui scheme Agnipath chu thalai te hmakhua ti chhe tu ani tih sawiin India venhimna kawngah that lohna tam tak a thlen thei tih a sawi bawk.
