Health Minister Pi Lalrinpuii’n Mizoram Health Care Scheme thar tur Mizoram Universal Health Coverage Scheme duan mek ani a ti a, April thla ah peih fel hman tum a ni tih sawiin mipui zawng zawng huapin kum khata cheng nuaih 5 thleng bill theih tura duan ani tih a sawi. He thu hi vawiina a pisa-a Press Conference ah sawiin Health Minister chuan Mizoram Sawrkar hmasa ah natna engkim bill theiha siam a ni a, mipui lam atanga lut tlem si nen corpus fund nena tan pawhin indaih a harsa em em a ti a, tihsual nawn tawhloh nan theihtawpa uluka zirchian mek a ni tih sawiin Sawrkarin damlote tan pawisa pek ngai loa in enkawlna (cashless system) a kalpui dawn a ti a, Health Care scheme atan hian sum hmuhna tur, hmanna tur leh bill theih chin te uluk taka duan mek ani tih a sawi.
Minister chuan tertiary health sector – kal thlak, lung thlak, cancer enkawlna ah te hmasawnna lian a awm theih nan chak taka hmalak ani a ti a, Mizo doctor thiam ten Mizoram damdawi inah ngei an tih ve theih nan hmalak mek ani tih sawiin tun financial year chhungin cancer hospital-a cancer zai theihna turin bultan an tum tih a sawi. Pi Lalrinpuii chuan National Health Mission hnuai atangin District Hospital 10 ah thisen leh zun test na Laboratory changtlung tak din tuma hmalak mek a ni a ti a, A thawh khatna atan District 3 – Siaha, Hnahthial leh Champhai ah te hmalak hmasak mek a ni a ti bawk.
Minister chuan SEDP hnuaia Nurse leh Health Worker lak te chu rawih chhunzawmna tur sum a awmloh avangin chawlhtir an ni a ti a, hemi avanga healh sector awngrawp palh thei venna turin thawktu awmsa semrual tura hmalak ani tih sawiin thawktu indaihloh zualna phuhruk turin zirchianna neih mek ani a ti a, Nurse 143 lak belh tumna chu thlen mek ani tih a sawi. Kulikawn Hospital tih changtlun ani dawn tih sawiin Health Minister chuan Civil Hospital, Aizawl tawt lutuk tih ziaawmna atan Kulikawn Hospital chu Civil Hospital Annexed atana hman ani dawn a ti a, cheng vaibelchhe 89.68 chu State Level Executive Committee in an pawm tawh tih a sawi bawk.
